Qazaqstanda sport legıonerleriniń sany 15 paıyzǵa azaıdy

Elde sport legıonerleriniń sany azaıyp keledi. Bul týraly Premer-Mınıstr Álıhan Smaıylovtyń Májilis depýtattarynyń saýalyna bergen jaýabynda aıtylǵan, dep habarlaıdy Kazinform.

«Sport túrleri boıynsha akkredıttelgen respýblıkalyq federatsııalarmen birlesip, sheteldik sportshylardy tartýdy qysqartý boıynsha jumys júrgizilýde. Fýtbol men hokkeıge arnalǵan kásiptik sporttyq oıyn klýbtaryn ustaýǵa memlekettik bıýdjetten jáne kvazımemlekettik sektordan bólinetin qarajat lımıti 1,2 mlrd teńgeden, qalǵan sporttyq oıyn túrleri boıynsha 450 mln teńgeden aspaıtyn soma belgilendi. Kásiptik klýbtar belgilengen shekten aspaýǵa tıis», - dedi Úkimet basshysy jaýabynda.

Onyń atap ótýinshe, sporttyq oıyn túrleri federatsııalarymen júrgizilgen jumystardyń nátıjesinde legıonerler sanyn tórtten eki oıynshyǵa deıin qysqartý týraly sheshim qabyldanǵan.

«Búgingi tańda «Qazaqstandyq fýtbol tárbıelenýshisi» ataǵyn alǵan qazaqstandyq fýtbol klýbtarynyń oıynshylaryna erekshe kóńil bólinedi. Osylaısha, ótken jyldarmen salystyrǵanda eldegi legıonerler sany 15 paıyzǵa azaıdy. Bul otandyq sportshylarǵa suranysty kórsetedi», -dedi Álıhan Smaıylov.