Qazaqstanda sport federatsııalarynyń qyzmetinde ózgeris bolady
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq normalardyń artyq zańnamalyq reglamenttelýin boldyrmaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Qujatta elimizdiń sport salasynda jańa irikteý júıesin engizý qarastyrylǵan. Zań jobasyna sáıkes, basym sport túrleri olardyń álemdik reıtıngteri negizinde emes, Olımpıada, Paralımpıada, Sýrdlımpıada, Azııa oıyndarynda ulttyq qurama komandalarynyń kórsetken nátıjeleri boıynsha irikteletin bolady.
«Qazir respýblıka boıynsha 180-nen astam sport túri damytylyp otyr. Sport túrleriniń barlyǵy boıynsha sport rezervin daıarlaý júzege asyrylady. Biraq, jyl saıyn 13 jazǵy jáne 5 qysqy olımpıadalyq sport túrinen medal jeńip alynady. Osynyń bári sportshylardy daıarlaý júıesindegi jattyǵýdyń bastapqy kezeńinen joǵary jetistikter sportyna deıingi sátsizdikterdiń nátıjesi sanalady. Osylaısha, biz jyl saıyn ýákiletti organ retinde balalar-jasóspirimder sport mektepteri men mektep-ınternattar shyǵyndarynyń óskenin baıqaımyz. Shyǵyndardyń eleýli bóligi olımpıadalyq emes sport túrleriniń daıyndyǵyna jumsalady», - dedi QR Týrızm jáne sport mınıstri Erbol Myrzabosynov.
Onyń aıtýynsha, zań jobasyn ázirleý barysynda jaqyn mańdaǵy (Ózbekstan, Belarýs) jáne alys shet elderdiń (Ulybrıtanııa, Germanııa, Norvegııa) halyqaralyq tájirıbesi zertteldi.
Qujat aıasynda sport federatsııalarynyń qyzmeti de ózgeredi. Qazirgi kezde jergilikti, óńirlik jáne respýblıkalyq federatsııalar jeke sýbektiler retinde sanalady. Olar bir-birine baǵynbaıdy. Tıisinshe sportty damytý boıynsha táýelsiz saıasat júrgizedi. Osynyń bári múddeler qaqtyǵysyna, jaýapkershiliktiń bulyńǵyrlyǵyna jáne sportty damytýdyń «baıaýlaýyna» ákeledi.
«Usynylyp otyrǵan model jergilikti federatsııalardyń akkredıttelgen respýblıkalyq (óńirlik) sport federatsııalaryna baǵynyshtylyǵyn kózdeıdi. Osyǵan baılanysty zań jobasy aıasynda joǵary jetistikter túrine jatatyn sport túrlerin naqty shekteý usynylady. Bul degenimiz – Olımpıada, Paralımpıada, Sýrdlımpıada, Azııa jáne Para Azııa oıyndary baǵdarlamasyna engizilgen sport túrleri, sondaı-aq ulttyq sport túrleri. Olardyń ishinde medaldyq nátıjesi bar sport túrleri basym sport túrlerine qosylady. Tıisinshe, respýblıkalyq ári jergilikti deńgeıde birinshi kezekte qarjylandyrylady. Sport rezervi tek joǵary jetistikter sportynyń túrleri boıynsha daıarlanady. Olardy daıarlaý ýákiletti organ bekitetin sporttyq daıarlyqtyń ulttyq standarttaryna sáıkes qatań júrgiziledi», - dedi mınıstr.
Onyń paıymynsha, osy ózgeristerdiń barlyǵy qazirgi sport júıesin jańǵyrtýǵa, onyń naqty nátıjege – «medal jeńip alýǵa» baǵdarlanýyna alyp keledi.
«Bıýdjet qarajatyn jumsaýdyń tıimdiligi jáne barlyq sport sýbektileriniń jaýapkershiligi artady», - dedi vedomstvo basshysy.
Atap aıtqanda, zań jobasynda taǵy da bir mańyzdy ózgeris bar, ıaǵnı Qazaqstan azamaty sanalmaıtyn sportshylardy memlekettik bıýdjet jáne kvazımemlekettik sektor sýbektileriniń qarajaty esebinen qarjylandyrýǵa tyıym salynady. Bul shara el azamattarynyń sportta da, qarjylyq qoldaýdada basymdyqqa ıe bolýyn qamtamasyz etedi.
Jaqynda Májilistiń osy máselege arnalǵan jumys tobyna jetekshilik etip júrgen depýtat Nartaı Sársenǵalıevpen osy qujat týraly suhbattasqan edik.
