Qazaqstanda SPID-ke qarsy jańa naýqan bastaldy
ALMATY. 12 qarasha. QazAqparat - Búgin Qazaqstanda SPID-ke qarsy naýqan bastaldy. Іs-sharany Salaýatty ómir saltyn qalyptastyrý máseleleri jónindegi ulttyq ortalyǵy men JITS-tiń (SPID) aldyn alý jáne oǵan qarsy kúres jónindegi respýblıkalyq ortalyq birlesip uıymdastyryp otyr. Bul shara 1 jeltoqsanda ótetin Dúnıejúzilik SPID-ke qarsy kúres kúnine oraılastyrylýda.
Salaýatty ómir saltyn qalyptastyrý máseleleri jónindegi ulttyq ortalyǵynyń dırektoryJámıla Battaqovanyń aıtýynsha, maqsat - qoǵamnyń nazaryn VICh\SPID máselesine aýdarý, halyqtyń aqparat bilý deńgeıin arttyrý, qoǵamdyq kózqarasty qalyptastyrý, profılaktıkalyq baǵdarlamalarǵa qoldaý kórsetý. Qazaqstandaǵy VICh indetiniń taralý jaǵdaıy indetti juqtyrý qaýpi joǵary toptarda shoǵyrlanǵan kezeńge sáıkes keledi, 15-49 jas aralyǵyndaǵylar arasynda indettiń taralý deńgeıi 0,2 paıyzdan aspaıdy. Bul Shyǵys Eýropa men Ortalyq Azııa aımaǵyndaǵy ortasha deńgeıden birneshe ese tómen. Josparly is-sharalardy ótkizýdiń nátıjesinde VICh indetine shaldyǵý sońǵy jyldary turaqtaldy jáne 2008 jylǵy 15,0 kórsetkishinen (100 myń adamǵa shaqqanda 2335 oqıǵa) 2012 jyly (100 myń adamǵa shaqqanda 2015 oqıǵa) 12,0 kórsetkishine deıin tómendedi. Retrovırýstarǵa qarsy dárilerdi qoldanýdyń nátıjesinde 2006 jyldan beri SPID-tiń saldarynan kóz jumýdyń kórsetkishi 2,3 esege azaıǵan (2006 jylǵy kórsetkish - 1000 adamǵa shaqqanda 24,2 oqıǵa bolsa, 2012 jyly bul kórsetkish 10,4 oqıǵany quraǵan).
SPID-ti aldyn alý jáne oǵan qarsy kúresý boıynsha respýblıkalyq ortalyqtyń bas dırektory Marat Túkeevtiń sózine qaraǵanda: «VICh indetiniń juǵý joldaryna qatysty aıtar bolsaq, tamyrǵa salynatyn esirtkilerdi tutynatyndar arasynda ıne salý jolymen taralatyn VICh indetiniń menshikti salmaǵy 2008 jylǵy 60 paıyzdan 2012 jyly 38,2 paıyzǵa deıin tómendegen. Al jynystyq jolmen taralatyn indettiń menshikti salmaǵy 2008 jylǵy 29 paıyzdan 2012 jyly 57,8 paıyzǵa deıin artqan».
