Qazaqstanda sozylmaly aýrýlary bar adamdarǵa arnalǵan tegin dáriler retseptisin berý jeńildetildi - A.Tsoı

ASTANA. QazAqparat - QR Densaýlyq saqtaý jáne áleýmettik damý vıtse-mınıstri Alekseı Tsoı QR DSÁDM-niń aǵymdaǵy jyldyń 6 aıyndaǵy densaýlyq saqtaý salasyndaǵy qyzmetiniń qorytyndysy boıynsha alqa májilisinde «Kezeksiz emhanalar» ımıdjdik jobasyn júzege asyrý týraly málim etti, dep habarlady pm.kz.

«Medıtsınalyq-sanıtarlyq alǵashqy kómek (MSAK) kórsetýdiń 294 uıymynda kezekterdi tómendetý boıynsha sharalardyń monıtorıngi júrgizilip, nátıjesinde barlyq aımaqtarda sozylmaly aýrýlary bar adamdarǵa arnalǵan tegin dáriler retseptisin berý protsedýralary jeńildetilgeni - onyń 3 aıǵa bir merzimde beriletini anyqtaldy», - dep atap ótti A. Tsoı.

Vıtse-mınıstrdiń aıtýynsha, ambýlatorlyq-emhanalyq kómek kórsetetin 286 uıymda tirkeý ornyna qońyraý shalý arqyly patsıentterdi aldyn ala dárigerge jazý nemese úıge shaqyrý sharalary engizilgen. 290 MSAK uıymdarynda shuǵyl kómek qajet etetin patsıentter úshin súzgi-kabınetter men dárigerge deıingi kabınetter jumys jasaıdy.

«Al profılaktıkalyq tekserilý maqsatynda kelgen patsıentter úshin 282 skrınıngtik kabınet qyzmet kórsetedi. Barlyq aımaqtarda Patsıentterdi qoldaý qyzmeti men «Qazir jáne dál osy jerde» qaǵıdasymen qyzmet kórsetetin senim telefony jumys isteıdi», - dep túıindedi ol.