Qazaqstanda sottylyq týraly anyqtama berýdiń jańa úlgisi engizildi

ASTANA. QazAqparat  - Búginnen bastap elimizde sottylyq týraly anyqtama berýdiń jańa úlgisi engizildi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Bas prokýratýrasy Quqyqtyq statıstıka jáne arnaıy esepke alý komıtetiniń tóraǵasy Baǵdat Mýsın málim etti, dep habarlaıdy QazAqparat.

«Búginnen bastap biz sottylyq anyqtamasyn jańa úlgide bere bastaıtyn bolamyz. Oǵan ne sebep boldy?  Osy kúnge deıin azamattardyń qylmysqa tartylǵandyǵy týraly barlyq málimetti bergen bolsaq,  endi sol anyqtamany sottylyǵynyń ótelgendigi men joıylǵandyǵyn eskere otyryp beremiz», - dedi Baǵdat Mýsın.

Onyń atap ótýinshe, jańa tizilim boıynsha kórsetiletin osy memlekettik qyzmettiń ataýy «Tulǵanyń qylmystyq quqyq buzýshylyq jasaǵany týraly málimetterdiń bolýy nemese bolmaýy týraly anyqtama berýdiń» ornyna «Sottylyqtyń bolýy nemese bolmaýy týraly anyqtama berý» bolyp ózgeredi.  Jalpy, jylyna dál osy anyqtama 2,2 mln. ret beriledi.

«ıAǵnı,  saǵat saıyn biz 1200 dana anyqtama beredi ekenbiz. Osynshama anyqtamanyń qajeti qansha jáne sonshama  adam Halyqqa qyzmet kórsetý ortalyqtaryna ne úshin barady? Ortasha eseppen alatyn bolsa, bir adam anyqtama alý úshin 3 saǵat ýaqytyn jumsaıdy eken», - dedi komıtet basshysy.

Onyń aıtýynsha, atalǵan qujat negizinen azamattardan  memlekettik organǵa jumysqa ornalasý  barysynda  talap etiletin. Al qazirgi ýaqytta kez kelgen jumys orny dál osy anyqtamany talap etetin boldy.

«Jalpy, jumysqa ornalasý barysynda mundaı anyqtamany talap etýdiń ózi zańsyzdyq», - dedi ol.

Mýsınniń sózine qaraǵanda, jańa standart qabyldanǵannan keıin sottylyǵy ótelgen nemese alynyp tastalǵan, olarǵa qatysty qylmystyq qýdalaý toqtatylǵan azamattar «Sottylyǵy joq» jazbasymen taza anyqtama alatyn bolady.