Qazaqstanda sottylyq týraly anyqtama berý tártibine ózgerister engizildi
«Taıaýdaǵy ýaqytqa deıin quqyqtyq statıstıka jáne arnaıy esepke alý organdary jeke adamdardyń aryzdary boıynsha sottylyqtyń bar ne joqtyǵy týraly málimetterdi bekitilgen «Sottylyqtyń bar ne joqtyǵy týraly anyqtama berý» memlekettik qyzmet kórsetý standarty sheńberinde sottylyqtyń joıylýy jáne alynýy eskerile otyryp berilip keldi.
Eńbek Kodeksine engizilgen ózgeristerge sáıkes kámeletke tolmaǵan balalar qatysatyn bilim, tárbıe berý, demalysty jáne saýyqtyrýdy uıymdastyrý, dene shynyqtyrý men sport, medıtsınalyq qamtamasyz etý, áleýmettik qyzmet kórsetý, mádenıet pen óner salalaryndaǵy eńbek qyzmetine kámeletke tolmaǵandarǵa qatysty kisi óltirý, densaýlyqqa qasaqana zardap keltirý, jynystyq tıispeýshilikke qarsy qylmystary úshin sottylyǵy bar nemese bolǵan adamdar jiberilmeıdi.
Osyǵan qaramastan tekserý barysynda buryn aýyr qylmys jasaǵany úshin sottalǵan adamdardyń bilim berý mekemelerinde jumys istep júrgenderi anyqtalǵan edi. Bulaı bolmaýy tıis.
Bul jáıtter arnaıy esepke alý málimetterin berý tártibin qaıta qaraý jáne beriletin aqparattar kólemin keńeıtý qajettiligin alǵa tartty.
Osyǵan oraı Qazaqstan Respýblıkasy Úkimetiniń 2014 jyldyń 17 mamyryndaǵy №505 qaýlysyna sáıkes burynǵy kórsetiletin memlekettik qyzmet «Qazaqstan Respýblıkasy Bas prokýratýrasynyń Quqyqtyq statıstıka jáne arnaıy esepke alý jónindegi komıtetiniń esepteri boıynsha adamnyń qylmys jasaǵany týraly málimetteri bolýy ne bolmaýy týraly aqparat berý» dep atalatyn boldy.
Endi anyqtamalarda sottylyqtyń joıylýyna jáne alynyp tastalynýyna qaramastan adamnyń aıyptalýyshy retinde jaýapqa tartylýynan bastap, odan ári onyń qylmystyq jaýaptylyqtan bosatylýy nemese jazalanýy, sondaı-aq atalǵan adamǵa qatysty aqtalmaǵan negiz boıynsha qylmystyq is qozǵaýdan bas tartý týraly sheshim qabyldaý týraly aqparattardyń barlyǵy kórsetiletin bolady.
Qarapaıym tilmen aıtqanda, endi quqyqtyq statıstıka jáne arnaıy esepke alý organdary azamattarǵa ol jasaǵan qylmystar týraly barlyq aqparattardy beretin bolady.
Bul rette, kórsetilgen málimetter memlekettik jáne basqa mekemelerdiń qoldanystaǵy zańdarǵa sáıkes paıdalanýyna jatatyny, onyń ishinde Qazaqstan Respýblıkasy Qylmystyq kodeksiniń 77-shi jáne 86-shy baptarynda qarastyrylǵan sottylyqtyń joıylýy jáne alynyp tastalý merizimderi de eskerilýge tıis.
Halyqqa qyzmet kórsetý ortalyqtarynan ne elektrondy úkimet portalynan alynǵan anyqtamalar qylmystyq ister jáne qylmystyq is qozǵaýdan bastartý týraly materıaldary jóninde protsessýaldyq sheshimder qabyldaǵan, sondaı-aq memlekettik qyzmet atqarýǵa ókiletti jáne oǵan teńestirilgen adamdarǵa qatysty arnaýly tekserýler óndirisi kezderinde paıdalanýǵa jatpaıdy.
Eger memlekettik organdar nemese basqa uıymdar Komıtet bergen málimetterdi zańnama talaptaryn buza otyryp paıdalansa, onda olardyń is-áreketi jóninde azamattar sotqa aryzdana alady.
Bul qyzmet buryǵydaı elektrondy sandyq qoltańba arqyly elektrondy úkimet portaly arqyly avtomattandyrylǵan rejımde kórsetiledi, al turǵylyqty jeri boıynsha Halyqqa qyzmet kórsetý ortalyqtaryna barsa 10 mınýttyń ishinde atqarylady. Azamattyń anketalyq derekteri basqa adamdardyń derekterimen tolyqtaı sáıkes kelgen jaǵdaıda, shatasyp teris aqparat berilmes úshin anyqtama 3 jumys kúni ishinde tolyqtaı tekserilip beriledi», - dep jazylǵan baspasóz habarlamasynda.
Sondaı-aq shetelge shyǵyp bara jatqan azamattarǵa yńǵaıly bolý úshin Halyqqa qyzmet kórsetý oryndarynda anyqtamalardy eltańbasy bar mór basylyp, jazbasha berý uıymdastyrylǵan.
