Qazaqstanda sottalǵandarǵa medıtsınalyq kómek qoljetimdiligi artty: ólim 5%-ǵa tómendedi

ASTANA. KAZINFORM — Qazaqstan Respýblıkasy Densaýlyq saqtaý mınıstrligi qylmystyq-atqarý júıesi (QAJ) mekemelerinde ustalatyn azamattardyń densaýlyq kórsetkishterinde oń dınamıka baıqalyp otyrǵanyn habarlady.

Byltyrǵy jyldyń qorytyndysy boıynsha sottalǵandardyń arasyndaǵy ólim 5%-ǵa tómendedi. Bul nátıjege medıtsınalyq ınfraqurylymdy damytý, profılaktıkalyq is-sharalardy keńeıtý jáne medıtsınalyq kómektiń qoljetimdiligin arttyrýdyń esebinen qol jetkizildi. 

Profılaktıkalyq qarap-tekserýlermen jáne skrınıngtermen qamtýdy keńeıtý aýrýlardy anyqtaý deńgeıin 28%-ǵa arttyrýǵa múmkindik berdi. Eń joǵary ósim qanaınalym júıesiniń aýrýlary men qant dıabetin qosa alǵanda sozylmaly ınfektsııalyq emes aýrýlar boıynsha tirkeldi.

— Mańyzdy baǵyttardyń biri telemedıtsınany engizý boldy. QAJ-dyń 17 mekemesinde arnaıy telemedıtsınalyq jabdyq ornatylyp, qashyqtan konsýltatsııalardyń sany 5 esege artty, sondaı-aq bilikti medıtsınalyq kómektiń qoljetimdiligi jaqsardy, — delingen habarlamada.

Sonymen qatar statsıonarlyq kómektiń qoljetimdiligi artty — táýlik boıy jáne kúndizgi statsıonarlarǵa emdeýge jatqyzý sany kóbeıdi. Sottalǵandardy medıtsınalyq qamtamasyz etý fýnktsııalary Іshki ister mınıstrliginiń júıesinen Densaýlyq saqtaý mınıstrliginiń qaraýyna berilgen sátten bastap ınfraqurylymdy jańǵyrtý boıynsha aýqymdy jumys júrgizildi. QAJ-dyń 78 mekemesinde (onyń ishinde 62 dárigerlik ambýlatorııa jáne 16 medıtsınalyq pýnkt) medıtsınalyq kómek kórsetý jaǵdaılary jaqsartyldy. Sonyń ishinde 55 nysanda (70%) aǵymdaǵy jáne kúrdeli jóndeý jumystary júrgizildi.

Densaýlyq saqtaý mınıstrligi azamattardyń mártebesi men ustalatyn ornyna qaramastan densaýlyq saqtaý quqyǵyn qamtamasyz etý jáne sapaly, qoljetimdi medıtsınalyq kómek kórsetý boıynsha júıeli jumysty jalǵastyrady.

Aıta keteıik, jaqynda qylmystyq zańnamaǵa keshendi ózgerister engizildi.