Qazaqstanda sottalǵandar úshin týǵan-týystarymen Skype arqyly sóılesý múmkindigi engizilmek
ASTANA. QazAqparat - QR Іshki ister mınıstrligi sottalǵandar úshin týǵan-týystarymen Skype arqyly sóılesý múmkindigin engizýdi josparlaýda. Bul týraly búgin Astanada QR Іshki ister mınıstriniń orynbasary Rashıd Jaqypov málim etti.
Qazirgi ýaqytta mınıstrlik jobany engizýdiń birneshe nusqalaryn qarastyrýda: Skype nemese ózge de IT-tehnologııalar arqyly.
«Mysaly, sottalǵan Astanada turady, biraq Oralda qylmys jasap, sonda jazasyn óteıtin boldy. Nemese Astanada sottaldy, biraq qalada jalpy rejimdi túrme joq, ony Stepnogorǵa jiberdi. Týǵan-týystary ary-beri júrmeýi úshin, shyǵyn bolmaı, Skype qoıyp qoısa, onlaın arqyly sóılese beredi», - dedi R. Jaqypov tilshilerge bergen suhbatynda.
Onyń sózine qaraǵanda, bul sottalǵan azamattar úshin januıasymen baılanys úzbeı, árdaıym sóılesip turýǵa múmkindik ashady.
«Kezdesýge tek eki adamnan kele alady, al mynda barlyq otbasymen kórisýge múmkindik týady. Esh shyǵyn da bolmaıdy», - deıdi vıtse-mınıstr.
Onyń aıtýynsha, qazirgi ýaqytta tıimdi tehnologııany anyqtap, zańǵa tıisti ózgerister engizý ǵana qajet.
«Biz buny bas bostandyǵynan aıyrý oryndarynan bosatylǵan jáne probatsııa qyzmetiniń esebinde turǵan azamattardy áleýmettik ońaltýdyń keshendi strategııasyna engizdik, bıýdjette muny eskeremiz, ony zańnamalyq turǵyda bekitedi. Menińshe, áleýmettik baılanystan ajyramaý úshin beıne konferentsııa óte tıimdi jol», - dep túıdi sózin R.Jaqypov.
