Qazaqstanda sottalǵan brakoner úsh kúnnen keıin taǵy aqbóken atýǵa shyqqan
Mysaly, 2013 jyly Qazaqstanda aqbókenderdi zańsyz atqan brakonerlerdiń ústinen 46 qylmystyq is qozǵalsa, 2014 jyly bul tsıfr eki esege artyp, 79 qylmystyq isti quraǵan. Bul týraly búgin Aýyl sharýashylyǵy Orman sharýashylyǵy jáne janýarlar álemi komıtetiniń otyrysynda komıtet tóraǵasynyń mindetin atqarýshy Qaırat Ústemirov aıtyp berdi.
«Zań tarapynan da, ózge de taraptardan qolǵa alyp jatqan sharalarymyzǵa qaramastan, aqbókenderdi aýlaıtyn barkonerlerdiń sany azaımaı tur. 2015 jyly 107 brakonerlik fakt tirkeldi. 2013 jyly aqbókenderdi atqan brakonerlerdiń ústinen 46 qylmystyq is qozǵalsa, 2014 jyly bul san eki esege artqan. Onyń ózinde de, 2013 jyldyń arhıvyn qarasaq, 46 qylmystyq is boıynsha, tek eki adam sottalǵan. Al qalǵan ister basqa baptarǵa aýystyrylǵan. 2015 jyly 85 qylmystyq is qozǵalǵan edi, tek jeti adam sotty boldy»,-deıdi Q.Ústemirov.
Al «Ohotzooprom» tabıǵatty qorǵaý uıymynyń dırektory Erzat Álzaqov «brakonerlerdiń azaımaýyna basty sebep - olardyń jaza jeńil bolady degen senimi» deıdi.
«Bizdiń mekemeniń qyzmetkerleri brakonerlerdi ustap, sol boıynsha tıisti isti quzyrly organdarǵa jiberedi. Bir qıyndyǵy - biz daladan bes brakoner ustasaq ta, bir brakoner ustasaq ta, tergeý barysynda bir adam ǵana tutqyndalyp, zań aldynda da sol bir adam jaýap beredi. Bul bizge qıyndyq týǵyzyp otyr. Sebebi, qalǵan tórt adam erteńinde ań aýlaǵaý taǵy shyǵady. Sondyqtan, biz Prokýratýralarǵa ustalǵan brakonerlerdiń barlyǵy jaýapqa tartylsyn degen usynys aıtyp otyrmyz. Ol úshin Qymystyq kodekske, ózge de quqyqtyq aktilerge ózgerister enizýdiń túk te qajeti joq. Tek qana tergeý sapaly, taza júrgizilýi kerek»,-degen maman qazir tipti brakonerlerdiń mingen kóligi men aqbókendi atqan kezde qoldanǵan ózge zattary tárkilenbeıdi de deıdi.
«2013-2014 jyldary Qylmystyq kodeks saı, qolǵa túsken brakonerlerdiń kólikteri tárkilenetin. Al 2015 jyly Qylmystyq kodekske engizilgen ózgerister bul bapty alyp tastaǵan, sondyqtan, Bas prokýratýranyń aldyna da Qylmystyq kodekske ózgerister engizip, kólikterdi mindetti tárkileý týraly talap qoıyp otyrmyz. Brakonerler aqbókenderdi atqany úshin qandaı aýyr jaza baryn, ıaǵnı, bas bostandyqtarynan aıyrylatynyn túsinbeıdi, qoryqpaıdy. Kóp bolsa aıyppul tólep, bolmasa shartty túrde bas bostandyǵynan aıyrylady. Mysaly, 2015 jyldyń 26 jeloqsanynda brakonerge qatysty sot otyrysy ótti, sol kúni shartty túrde jazasyn óteý týraly sheshim shyǵaryldy. Qyzyq bolǵanda, 29 jeltoqsan kúni dál sol adamdy aqbóken atqany úshin taǵy qolǵa túsirdik»,-dep kúrsindi E.Álzaqov.