Qazaqstanda sot tóreligin damytýǵa halyqaralyq bankten 36 mln. dollar bólinedi
ASTANA. QazAqparat - Búgin Májilistiń jalpy otyrysynda palata depýtattary «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy Qaryz týraly kelisimdi (Sot tóreligi sektoryn ınstıtýtsıonaldyq nyǵaıtý jobasy) ratıfıkatsııalaý týraly» zań jobasyn maquldady.
Atalǵan zań jobasyna sáıkes, Halyqaralyq Qaıta Qurý jáne Damý Banki Qazaqstanǵa sot tóreligi sektoryn ınstıtýtsıonaldyq nyǵaıtýǵa 36 mln. dollar qaryz beredi.
Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy qaryz týraly kelisim 2014 jyldyń 29 sáýirinde Astanada jasaldy. Soǵan sáıkes, Bank Qazaqstannyń sot tóreligi sektoryn ınstıtýtsıonaldyq nyǵaıtý jobasyn qarjylandyrýǵa 36 mln. AQSh dollary somasynda qaryz bermek. Qaryzdy óteý merzimi - 15 jyl. Respýblıkalyq bıýdjetten qosa qarjylandyrý mólsheri 23,9 mln. dollardy qurap otyr.
Bul rette Qazaqstandaǵy quqyqtyq júıeni jetildirýge baǵyttalǵan joba quqyqtyq jáne ınstıtýtsıonaldyq bazanyń basty elementterin nyǵaıtý, sýdıalardyń tıimdiligin jáne kásibıligin arttyrýdy qamtıdy.
Májilis maquldaǵan zań jobasy Parlament Senatyna joldanady.
