Qazaqstanda sot-psıhıatrııalyq saraptamany Ádilet mınıstrligi júrgizetin boldy

ASTANA. QazAqparat - Qazaqstanda sot-psıhatrıalyq saraptama júrgizýdi Ádilet mınıstrligi júzege asyratyn bolady. Bul týraly mınıstrlik janyndaǵy Sot saraptaý ortalyǵynyń dırektory Isıdor Borchashvılı málimdedi.

«Bir aptadan keıin sot-psıhıatrııalyq saraptama júrgizý bizdiń quzyretimizge ótedi. Osylaısha, Ádilet mınıstrligi aıasynda barlyq saraptaý mekemelerin biriktirý úderisi aıaqtalady. Biriktirý júrip jatqandyqtan biz eldegi sot-saraptaý qyzmetin damytý tujyrymdamasyn ázirledik», - dep atap ótti ol, búgin «Jekemenshik sot saraptamasy ınstıtýtyn damytý» taqyrybynda ótken dóńgelek ústel jıynynda.
Onyń aıtýynsha, osy tujyrymdamany iske asyrý aıasynda «Sot-saraptaý qyzmeti týraly» Zańynyń jańa jobasy ázirlendi. Bul zań jobasynda jekemenshik sot-saraptaý qyzmetin damytýǵa erekshe nazar aýdarylady.
Atalǵan sharany QR Ádilet mınıstrligi QR Parlamenti Májilisiniń zańnama jáne sot-quqyqtyq reforma komıteti, «Qazaqstanda qylmystyq ádil sotty jetildirý» Eýrpalyq odaǵynyń jobasynyń qoldaýmen jáne «Nur Otan» partııasynyń quqyqtyq keńesimen birlesip uıymdastyrdy.