Qazaqstanda sot oryndaýshylardyń jaýapkershiligi kúsheıtilmek
«Bizde sot oryndaýshylarynyń moınyna artylatyn jaýapkershiliktiń úsh túri bar: tártiptik, lıtsenzııany toqtatý jáne lıtsenzııanyń kúshin joıý. Qazirgi ýaqytta ortaq formatqa sáıkes kóp jaǵdaıda buzýshylyqtyń dárejesine qaraı lıtsenzııa toqtatylady nemese onyń kúshi joıylady», - dedi Ádilet mınıstrliginiń sot aktilerin oryndaý departamenti dırektorynyń orynbasary Ámir Omarov atalmysh mınıstrlikte ótken dóńgelek ústelde.
Búgingi kúni eger sot oryndaýshysyna júktelgen mindet jetkilikti dárejede oryndalmaǵan jaǵdaıda onyń lıtsenzııasy avtomatty túrde toqtatylady.
«Eger sot oryndaýshy berilgen eki aıdyń ishinde eshqandaı áreket jasamasa, onyń lıtsenzııasy kúshin joıady. Ádilet mınıstrligine túsken shaǵymdar tekserýge tolyqqandy negiz bola alady», - dedi spıker.
Departament dırektorynyń orynbasary óz sózinde atalmysh norma ázirge Májilis qaraýynda jatqanyn aıtady.
«Zańǵa engizilgen ózgerister shamamen jyldyń sońyna deıin kúshine enedi», - dedi Ámir Omarov.
Eske sala ketsek, buǵan deıin joǵaryda atalǵan departamenttiń dırektory Darhan Igembaev Qazaqstanda 216 myń boryshker alıment tólep jatqanyn málim etken bolatyn. Onyń aıtýynsha, elimizde alımenttik bereshek boıynsha qordalanǵan máselege baılanysty sot oryndaýshylar boryshkerlerge jumys izdeýge májbúr bolyp otyr.
Óz kezeginde Ádilet mınıstri Marat Beketaev elimizde alıment tóleýshilerge arnalǵan kómek qory qurylýy múmkin ekenin habarlady.
