Qazaqstanda sońǵy jeti jylda birde-bir dıfterııa jaǵdaıy tirkelgen joq - DSÁDM
Halyqty ımmýndaý maqsatynda dıfterııa, kókjótel, sirespege qarsy ımmýnıtetti jasaý úshin keshendi vaktsına qoldanylady. Vaktsınalaý Qazaqstannyń Ulttyq ekpe kúntizbesine saı 2 aıdan bastap 60 jasqa deıin jasalady.
Aıta keterligi, dıfterııa - aǵzanyń barlyq músheleri men júıesin zaqymdaıtyn, aýyr túrde ótetin juqpaly aýrý. Dıfterııa aýrýy dene qyzýynyń joǵarylaýy, jalpy álsizdikten bastalady da, jutynǵanda aýyrsyný belgileri baıqalady. Kóp jaǵdaıda adamdar aýrýdyń alǵashqy belgilerin baspa (angına) dep qabyldap, ózdiginen emdeýdi bastap ketedi. Bul dıfterııa jaǵdaıynda óte qaýipti. Juqpaly aýrý syrqattanǵan adam nemese aýrýdy tasymaldaýshy sóılegende, túshkirgende, jótelgende aýaǵa taralatyn bakterııalar arqyly juǵady. Dıfterııa taıaqshalary muryn, ańqa, joǵary tynys joldarynyń shyryshty qabatyna túskende jyldam kóbeıip, ortalyq júıke júıesin, tamyrlar men júrekti zaqymdaıtyn erekshe dıfterııalyq ýly zatty bóledi. Dıfterııa ózge juqpaly aýrýlarǵa qaraǵanda, kóptegen asqynýlarǵa: júrek bulshyqetiniń, tynys alý joldary men dıafragma, jumsaq tańdaı, bet, moıyn, dene jáne qol-aıaq bulshyqetiniń sal aýrýlaryna ákeledi. Mundaı juqpaly dertte ólim qaýpi joǵary, jyl saıyn 10-nan 20%-ǵa deıin aýrýǵa shaldyqqan syrqat adamdardyń ólimine ákeledi.
Esterińizge sala keteıik, jyl saıyn Qazaqstanda juqpaly aýrýlarǵa qarsy 5 mln-ǵa jýyq adam, onyń ishinde 1,3 mln. balalar egiledi. Immýnoprofılaktıka salasyndaǵy memlekettik saıasat eskertý sharalaryna baǵyttalyp, syrttan tasymaldaý jaǵdaıynda juqpaly aýrýlardy oqshaýlaý men joıýǵa negizdeledi. Halyqty vaktsınalaý 21 juqpaly aýrýlarǵa qarsy Ulttyq egý kúntizbesine sáıkes tegin júrgiziledi.