Qazaqstanda sońǵy úsh jylda syıymdylyǵy 42 myń tonna bolatyn 10 kókónis saqtaý qoımasy iske qosyldy

Bul týraly «Azyq-túlik kelisim-shart korporatsııasy» UK» AQ-nyń baspasóz qyzmetinen málim etti.

Eldiń azyq-túlik qaýipsizdigin qamtamasyz etý, otandyq azyq-túlik taýarlarynyń óndirisin ulǵaıtý jáne baǵany turaqtandyrý maqsatynda Qazaqstanda keń aýqymdy baǵdarlama júzege asyrylýda. Ádette, halyqty azyq-túlik ónimderimen qamtamasyz etý máselesi kóterilgende, ony saqtaý boıynsha qısyndy suraqtar týyndaıdy. Mol egin - azyq-túlikke molynan kenelýge kepildik bermeıdi, sebebi, kóp jaǵdaıda egindi saqtaıtyn qoımalar bolmaıdy.

Respýblıkada azyq-túlik klasterin qurý maqsatynda agrarlyq qarjy ınstıtýttary iri qalalar, atap aıtqanda, Astana men Almatynyń aınalasynda azyq-túlik beldeýin qurýdy kózdeıtin ınvestıtsııalyq jobalardy júzege asyrýda. Jobalardyń deni memlekettik agrarlyq qarjy ınstıtýttarymen iske asyrylýda. Olardyń arasynda «Azyq-túlik kelisim-shart korporatsııasy» UK» AQ bar.

Astana men Almatynyń aınalasynda azyq-túlik beldeýin qurý jobasy sheńberinde Azyq-túlik kelisim-shart korporatsııasy Almaty oblysynda 13 myń tonna ónimdi saqtaýǵa arnalǵan kókónis qoımasyn saldy. «Korporatsııa Astananyń azyq-túlik beldeýin qurý maqsatynda halyqtyń suranysyna asa ıe kókónis daqyldary - kartop, sábiz, qyryqqabatty ósiretin myń jarym gektar jerdi ıgerý jobasyn da júzege asyrýda. Onymen birge, 10 myń tonnaǵa arnalǵan kókónis qoımasy salynýda», - delingen taratylǵan habarlamada.

Kompanııanyń baspasóz qyzmetinen málim etkendeı, sońǵy úsh jylda Qazaqstanda barlyǵy 42 myń tonna ónimdi syıdyra alatyn 10 kókónis saqtaý qoımasy iske qosyldy. Jyl sońyna deıin taǵy 8-i daıyn bolmaq. QR Aýyl sharýashylyǵy mınıstrliginiń baǵalaýynsha, saqtalýy tıis azyq-túliktiń barlyq kóleminiń 56 paıyzy «jabyldy».