Qazaqstanda sońǵy úsh aıda áli qatyp úlgermegen muz astyna 5 bala túsip ketken
NUR-SULTAN. QazAqparat – QR Tótenshe jaǵdaılar mınıstrliginiń aýmaqtyq bólimsheleri sý qoımalarynda azamattardy (ásirese balyqshylardy) qaýipti jaǵdaıdan saqtandyrýǵa baǵyttalǵan reıd sharalaryn júrgizip, balyq aýlaǵan kezdegi qaýipsizdik erejeleri jazylǵan jadynamalardy taratýda, dep habarlaıdy QazAqparat tilshisi.
Osylaısha, 2020 jyldyń 9 jeltoqsanynda TJM men Nur-Sultan qalasy boıynsha TJ departamenti, volonterlermen birigip, elordanyń sý qoımalarynda kezekti reıd sharalaryn júrgizdi. Qystyń sýyǵyna qaramastan dál qazir balyq aýlaýǵa qushtar azamattar barshylyq. Mamandar olarǵa alǵashqy medıtsınalyq kómek qalaı kórsetiletinin, muzǵa túsip ketken adamdy qalaı qutqarý kerektigin kórsetti.
Jalpy búkil respýblıka boıynsha TJD men PD qyzmetkerleri patrýldeý, balyq aýlaıtyn oryndarda, muzdy ótkelderde reıd jumystaryn júrgizedi. Kúz bastalǵaly búkil el aýmaǵynda 4 512 patrýl men reıd ótkizilip, sýda (muz ústinde) qaýipsizdik erejelerin saqtaý jóninde 15 769 nusqaýlyq júrgizilgen.
Qaýipti sý qoımalaryndaǵy muzdyń qalyńdyǵy da tekserilýde. Ásirese muzdy ótkelderde, balyq aýlaıtyn oryndarda 1095 eskertý belgisi qoıylǵan.
Atap óterligi, ańshylyq pen balyq aýlaý maýsymy bastalǵaly (2020 jyldyń 1 qazany men 7 jeltoqsany aralyǵy) eldegi sý qoımalarynda 16 adam kóz jumǵan. Onyń beseýi balalar.
Naqtyraq aıtqanda balyq aýlaý kezinde qaýipsizdik erejeleriniń saqtalmaýy saldarynan 11 adam kóz jumsa, 5 bala muz jarylyp, sýǵa ketken.
