Qazaqstanda sońǵy on jylda kóshi-qonnyń oń saldosy 97 myń adamdy qurap otyr
ASTANA. QazAqparat - Qazaqstanda sońǵy on jylda kóshi-qonnyń oń saldosy 97 myń adamdy qurap otyr. Búgin Parlament Májilisi Áleýmettik-mádenı damý komıtetiniń otyrysynda QR Statıstıka agenttigi tóraǵasynyń orynbasary Aıdyn Ashýev osylaı málim etti.
Otyrysta elimizdegi ishki jáne syrtqy kóshi-qon problemalary talqylanǵan bolatyn.
«Sońǵy 10 jylda elimizde kóshi-qonnyń oń saldosy qalyptasty. Sonyń ishinde eń joǵary kórsetkish 2006 jylǵa tıesili - bul jyly elimizge kelýshiler kórsetkishi 33 myń adamǵa jetti. Degenmen, sońǵy 2012-2013 jyly kórsetkishtiń azǵantaı teris saldosy oryn aldy. Jalpy, 2004-2013 jyldary Qazaqstanǵa 483,6 myń adam kelip, elimizden ketkender sany 386,6 adam ketti. Osylaısha, sońǵy on jylda kóshi-qonnyń oń saldosy 97 myń adamdy qurap otyr», - dedi A. Ashýev.
Onyń aıtýynsha, Qazaqstandaǵy kóshi-qon almasýy negizinen TMD elderimen arada oryn alýda. Máselen, sońǵy 10 jylda TMD elderinen Qazaqstanǵa kelgender jáne osy TMD elderine ketkender sanynyń úlesi 82,6 jáne 89,4 paıyzdy quraǵan. Sonyń ishinde elge kelgen mıgranttardyń 43,3 paıyzyn burynǵy Reseı azamattaryn qurasa, 41,1 paıyzy Ózbekstannan keldi. Qalǵan Ýkraına, Qyrǵyzstan men Belarýstan kelgender 10 paıyzdan asady.
«2004-2013 jyldar aralyǵynda álem elderinen elimizge kelgen oralmandardyń 47,3 paıyzy Qytaıdyń úlesine tıse, 26,2 paıyzy Mońǵolııadan, 5,1 Germanııadan, 3,5 paıyzy Túrkııadan, 2,3 paıyzy Grýzııadan kelip otyr. Al elimizden basqa elderge ketkenderdiń 85,1 paıyzy Germanııaǵa barsa, 4,6 paıyzy AQSh-qa, 4,1 paıyzy Kanadaǵa, 2,5 paıyzy Izraılge qonys aýdarǵan», - dedi A. Ashýev.
