Qazaqstanda sońǵy eki jylda temeki ındýstrııasy naryǵynyń kólemi 25 paıyzǵa tómendedi - J. Sadyqova (FOTO)
ALMATY. QazAqparat- Qazaqstanda sońǵy eki jylda temeki ındýstrııasy naryǵynyń kólemi 25 paıyzǵa tómendedi. Bul týraly búgin Almatyda ótken baspasóz máslıhaty barysynda «Temeki tútininen azat Qazaqstan úshin» Ulttyq koalıtsııanyń kóshbasshysy Jamılá Sadyqova málim etti.
«Temeki ónimderi satylymynyń sońǵy eki jylda 25 paıyzǵa tómendep ketýi birneshe faktorlarǵa baılanysty bolyp otyr. Mysaly, qoǵamdyq oryndarda temeki shegýge tyıym salynýy jáne temeki qoraptaryna qorqynyshty sýretterdiń basylýy buǵan eleýli áser etti. Al osy jerde qorqynyshty sýretterdiń áseri qalaı boldy? Ol úshin aýqymdy zertteý júrgizý qajet. Biraq, taılandtyq tájirıbege súıenýge bolady. Óıtkeni, biz Qazaqstanda 2012 jyly temekiniń zııandylyǵy týraly qorqynyshty sýretterdi engizgende dál osy taılandtyq tájirıbeni basshylyqqa alǵanbyz. Sonymen, temeki qoraptaryna jańa qorqynyshty sýretter basylǵan kezde, temeki shegýshilerdiń 4 paıyzy, ıaǵnı jańadan temekige áýestenip júrgender sol mezette temekini tastap ketedi. Al 20 paıyzy úsh jyl ishinde tastaıdy. Salaýatty ómir saltyn qalyptastyrý problemalary Ulttyq ortalyǵynyń derekteri boıynsha Qazaqstanda sońǵy 4 jyl ishinde temeki shegýshiler qatary 6 paıyzǵa azaıǵan», - dedi J. Sadyqova.
Óz kezeginde Almaty qalalyq Salaýatty ómir saltyn qalyptastyrý ortalyǵynyń dırektory Galına Býlygına temekige áýes almatylyqtar qatarynyń da azaıyp jatqandyǵyn jetkizdi.
«Almatyda dál qazirgi tańda eresek turǵyndardyń 14 paıyzdan astamy temeki shegedi. Olardyń qatary birtindep azaıyp jatyr. Eger 2014 jyly turǵyndardyń 18,2 paıyzy temeki shekken bolsa, ótken jyly bul kórstkish 17 paıyzǵa tústi», - dedi G. Býlygına. 
