Qazaqstanda sońǵy bes jylda 490 jańa mektep salyndy
ANA. 23 mamyr. QazAqparat /Qanat Mámetqazyuly/ -Qazaqstanda sońǵy bes jylda orta bilim júıesinde 490 jańa mektep salyndy. Bul týraly búgin QR Parlamenti Májilisinde ótken Úkimet saǵatynda Bilim jáne ǵylym mınıstri Baqytjan Jumaǵulov málim etti.
«Budan bólek Nazarbaev Zııatkerlik mektepter jelisi qurylýda. Qazirgi ýaqytta respýblıkada osyndaı 6 mektep jumys isteıdi. Osy jyldan bastap olarda halyqaralyq bakalavrıat baǵdarlamasy engizildi. Bul osy baǵdarlamanyń eń úzdik túlekterine álemniń jetekshi ýnıversıtetterine qosymsha emtıhan tapsyrmaı-aq túsýine múmkindik beredi. Osy maqsattarǵa 977 mln. teńge bólingen», - dedi mınıstr. Onyń aıtýynsha, Qazaqstanda múmkindigi shekteýli balalar da nazardan tys qalyp otyrǵan joq. Máselen, búgingi kúni 9 myń 300 bala densaýlyǵyna baılanysty mektepke bara almaıdy eken. Sondyqtan da, memleket aǵymdaǵy jyldan bastap 3 myńnan astam osyndaı balalardy kompıýtermen, olardyń jeke erekshelikterin eskere otyryp, sapaly qashyqtyqtan oqytý úshin ınternetpen, baǵdarlamalyq jabdyqtaýmen qamtamasyz etedi. «Aldaǵy úsh jylda dál osy sanattaǵy balalardyń máselesi tolyǵymen sheshimin tabatyn bolady. Bul baǵytta 5,6 mlrd. teńge qarastyrylǵan», - dedi B. Jumaǵulov.
