Qazaqstanda sońǵy 5 jylda qus eti óndirisi 30 paıyzǵa ulǵaıdy - G. Isaeva
ALMATY. QazAqparat - Qazaqstanda sońǵy 5 jyl ishinde qus eti óndirisi 30 paıyzǵa ulǵaıdy. Bul týraly búgin Almatyda Qus ósirýshilerdiń tórtinshi Qazaqstandyq halyqaralyq forýmy barysynda QR Aýyl sharýashylyǵy vıtse-mınıstri Gúlmıra Isaeva málim etti.
Onyń aıtýynsha, qazirgi tańda elimizde jylyna 134 myń tonna qus eti óndiriledi eken. «Bul bizge shet elderden jetkiziletin qus etiniń kólemin azaıtýǵa múmkindik berdi. Eger 2007 jyly elimizde tutynylatyn qus eti kóleminiń 70 paıyzy shet elderden jetkizilgen bolsa, búginde ol 55 paıyzdy quraıdy. Bizde qazir qus sharýashylyǵy salasyn damytý boıynsha aldaǵy 7 jylǵa arnalǵan jospar bar. Ol boıynsha 2020 jylǵa deıin Qazaqstanda qus eti óndirisiniń kólemin jylyna 230-240 tonnaǵa jetkizý kózdelgen. Sonda ishki naryqtyń suranysyn tolyǵymen qamtamasyz etemiz. Buǵan sózsiz qol jetkizemiz. Óıtkeni, memleket tarapynan kórsetiletin qarjylaı kómek 6,8 mlrd. teńgeden 25 mlrd. teńgege ulǵaıtyldy», - dedi G. Isaeva. Sonymen qatar ol, qazirgi tańda ishki naryqty qus jumyrtqasymen tolyq qamtamasyz etýge qol jetkizilgenin jetkizdi. «Elimizde jumyrtqa óndirisi sońǵy 5 jyl ishinde 15 paıyzǵa ósti. Qazirgi tańda jylyna 4,3 mlrd. dana jumyrtqa óndiriledi. Al bul, ishki naryqtyń suranysyn tolyǵymen qamtamasyz etip otyr. Biz qazir tipti jumyrtqany eksportqa shyǵara bastadyq», - dedi G. Isaeva. Aıta ketelik, elimizge qus eti tutas jáne múshelengen kúıinde Reseı, Belorýssııa, Ýkraına, AQSh jáne birqatar Eýropa elderinen jetkiziledi. Forým jumysy odan ári jalǵasýda.
