Qazaqstanda sońǵy 5 jylda asa qaýipti juqpaly aýrýlar tirkelgen joq - QR Densaýlyq saqtaý mınıstrliginiń epıdemıologııalyq qadaǵalaý basqarmasynyń bastyǵy
ALMATY. 31 qazan. QazAqparat - Qazaqstanda ózge memleketterden shyqqan juqpaly aýrýdyń el aýmaǵyna taralýynyń aldyn alý úshin shekarada 35 sanıtarlyq karantındik pýnkter jumys jasaýda. Bul týraly búgin Almatyda Dúnıejúzilik densaýlyq saqtaý uıymynyń (DDU) Halyqaralyq medıtsınalyq-sanıtarlyq erejelerin (HMSE) júzege asyrý boıynsha ótip jatqan kóp tarapty memleketaralyq semınarynda aıtyldy.
«Eki kúndik bul sharaǵa Dúnıejúzilik densaýlyq saqtaý uıymynyń shtab-páterinen kelgen ýákilder men Ázirbaıjan, Armenııa, Ózbekstan, Qyrǵyzstan, Tájikstan elderiniń sarapshylary qatysýda. Qazaqstan sońǵy birneshe jylda HMSE-ni júzege asyrýda jaqsy tabystarǵa jetip otyr. Sondyqtan onyń tájirıbesin kórshiles elderge kórsetý úshin Dúnıejúizlik densaýlyq saqtaý uıymy Qazaqstanda ádeıilep osy halyqaralyq semınardy ótkizip otyr», - deıdi QR Densaýlyq saqtaý mınıstrliginiń epıdemıologııalyq qadaǵalaý basqarmasynyń bastyǵy Aıtmaǵambet Jolshorınov.
Qazaqstan DDU-nyń 2007 jyly qabyldanǵan HMSE júzege asyrý barysynda juqpaly aýrýlardyń aldyn alý úshin keshendi jospar quryp, ol Úkimet qaýlysymen bekitilgen bolatyn. Aıtmaǵambet Jıdebaıulynyń aıtýynsha, sonyń arqasynda keıingi 5 jyldyń ishinde Qazaqstanda asa qaýipti aýrýlar tirkelgen joq. Ásirese 2010 jyly polıomıelıt aýry búkil jerde burq etkende Qazaqsanda bir ǵana jáıt tirkeldi. Onyń ózi basqa elden kelgen azamattan anyqtaldy. «Aldyn alý sharalaryn joǵary deńgeıde ótkizý nátıjesinde biz halyqty qaýipti aýrýdan saqtap otyrmyz. Keden odaǵy aıasynda sanıtarlyq karantın pýnkterin ońtaılandyryp, olardy qaıta jańarttyq. Qazirgi kezde el aýmaǵynda aýrýdyń aldyn alý úshin shekarada ózge elden kelgen azamattardyń bárin sanıtarlyq baqylaýdan ótkizý úshin 35 sanıtarlyq karantındik pýnkter ornalastyrylyp otyr. Ondaǵy jylý ızolıatorynan ótkende adamnyń dene qyzýy joǵary bolsa ony oqshaýlap, tekseremiz. Ol dıagnozy anyqtalǵanǵa deıin dárigerlerdiń qaraýynda bolady», - deıdi Aıtmaǵambet Jolshorınov.
