Qazaqstanda sońǵy 17 jylda jumyssyzdyq kórsetkishi 2,7 esege azaıdy

ASTANA. QazAqparat - 1999-2015 jyldary Qazaqstanda jumyssyzdyq kórsetkishi 2,7 esege tómendep, 5%-dy qurady (1999 - 13,5%), jumyssyz adamdardyń sany 1999 jylǵy 950 myń adamnan 2015 jyly 451,1 myń adamǵa azaıdy, dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmeti.

Jumyssyzdyq deńgeıiniń kórsetkishi - ekonomıkalyq belsendi turǵyndardyń jumyssyzdarǵa shaqqandaǵy qatynasy. 

Eske sala ketsek, Memleket basshysynyń 2015 jylǵy 30 qarashadaǵy «Qazaqstan jańa jahandyq naqty ahýalda: ósim, reformalar, damý» atty Qazaqstan halqyna Joldaýyndaǵy jumyssyzdyqqa jol bermeý boıynsha berilgen tapsyrmasyn oryndaý maqsatynda QR DSÁDM turaqty túrde jumys oryndaryn saqtaý men azamattardy jumysqa ornalastyrý boıynsha belsendi sharalar júrgizip keledi. 

2015 jyly «Jumyspen qamtý 2020 jol kartasy» baǵdarlamasyn júzege asyrý sharalary aıasynda 156 myń adam jumysqa ornalastyrylyp, onyń ishinde 142,3 myń adam turaqty jumyspen qamtyldy.