Qazaqstanda sońǵy 10 jylda densaýlyq saqtaý salasyndaǵy shyǵyndar 10 esege artty
ALMATY. 15 mamyr. QazAqparat - 2010 jyly densaýlyq saqtaý salasyna jumsalǵan jalpy shyǵyn Respýblıkalyq densaýlyq saqtaý ortalyǵynyń aldyn ala málimetterine qaraǵanda 2010 jyly 882,2 mlrd. teńgeni nemese jalpy ishki ónimniń 4,04 paıyzyn
qurady. Ony «Qazaqstanda densaýlyq saqtaý salasyndaǵy Ulttyq shottar júıesin ilgeriletý» jobasyn júzege asyrýshylar búgin Almatyda ótkizgen baspasóz máslıhatynda aıtty.
«Qazaqstanda sońǵy 10 jylda densaýlyq saqtaý salasyna ketken shyǵyn kólemi 10 esege artty. Dúnıejúzilik densaýlyq saqtaý uıymynyń málimetterine qaraǵanda elimizdegi densaýlyq saqtaýǵa ketetin barlyq shyǵynnyń 41 paıyzǵa jýyǵy jeke sektordyń úlesine tıesili. Onyń 99 paıyzy halyqtyń qaltasynan shyǵarylatyn bolsa, tek 1 paıyzy ǵana saqtandyrý kompanııalary esebinen tólenedi», - deıdi Qazaqstanda densaýlyq saqtaý salasyndaǵy Ulttyq shottar júıesin ilgeriletý» (DSUSh) jobasynyń jetekshisi Marııa Ýmarova. Onyń aıtýynsha, álemdik tájirıbede DSUSh negizindegi málimetterdi taldaýdan keıin densaýlyq saqtaý salasyn qarjylandyrý boıynsha eleýli ózgeristerge bastama berildi. Ony engizý densaýlyq saqtaýǵa ketetin shyǵyndardy naqty málimetterge súıene otyryp tıimdi túrde josparlaýǵa múmkindik beredi. Ony qoldaný densaýlyq saqtaýdyń memleket tarapynan belsendi túrde reformalanyp jatqan júıeleri úshin erekshe mańyzǵa ıe. Máselen, shyǵyndy josparlaý kezinde DSUSh málimetterin esepke alǵanda, saqtandyrý medıtsınasyna aýysý, emhanalar men aýrýhanalardy salý jónindegi máselelerdi sheshý barynsha tııanaqty ári tıimdi bolady.
