Qazaqstanda sońǵy úsh jylda 14 sábı poıyzda ómirge kelgen
ASTANA. KAZINFORM – Bul týraly «Jolaýshylar tasymaly» AQ basqarma tóraǵasy Ánýar Ahmetjanov Astanadaǵy «Nurly jol» vokzalynda ótken jolaýshylar poıyzdarynyń tsıfrlyq ekojúıesiniń tanystyrylymynda aıtty.
Onyń aıtýynsha, poıyzdarda túrli jaǵdaılar kezdesedi. Sonyń biri – jol ústinde sábılerdiń dúnıege kelýi.
– Ulttyq tasymaldaýshynyń poıyzdarynda túrli oqıǵalar bolady. Olardyń arasynda qýanyshty jaǵdaılar da bar. Atap aıtqanda, sońǵy úsh jylda poıyzdarymyzda 14 kishkentaı qazaqstandyq dúnıege keldi. Bizdiń jolserikter mundaı jaǵdaılarǵa arnaıy daıyndyqtan ótken, – dedi Ánýar Ahmetjanov.
Basqarma tóraǵasy poıyzdarǵa spýtnıktik ınternet ornatý medıtsınalyq kómek qajet bolǵan jaǵdaıda da paıdaly ekenin atap ótti.
Onyń sózinshe, jol ústinde kútpegen jaǵdaı týyndasa, poıyz qyzmetkerleri medıtsınalyq mekemelermen jáne basqa da tıisti qyzmettermen jedel baılanysa alady. Bul ásirese eldi mekenderden shalǵaı aımaqtarda mańyzdy.
Buǵan deıin ulttyq tasymaldaýshynyń 51 baǵyt boıynsha qatynaıtyn 108 poıyz quramyndaǵy 1500-den astam vagon Starlink spýtnıktik ınternetimen jabdyqtalǵany habarlandy.
