Qazaqstanda sońǵy on kúnde qar qursaýynan 145 adam qutqaryldy
ASTANA. KAZINFORM – 11-20 aqpan aralyǵynda qolaısyz aýa raıyna baılanysty Tótenshe jaǵdaılar mınıstrliginiń qutqarýshylary qar qursaýynan 145 adamdy, onyń ishinde 17 balany qutqaryp, evakýatsııalady. Sondaı-aq 48 avtokólik shyǵaryldy.
Boran, kóktaıǵaq, qatty jel jáne nóldik kóriný jaǵdaılaryna baılanysty daýyldy eskertýler men avtojoldardyń jabylýy týraly aqparat halyqqa SMS-habarlamalar, TJM jáne aýmaqtyq bólimshelerdiń ınternet-resýrstary men áleýmettik jelileri arqyly jetkizildi. Avarııalyq-qutqarý jáne izdestirý-qutqarý jumystaryna qutqarýshylar men polıtsııa qyzmetkerleri jumyldyryldy.
- TJD bólimsheleri ótimdiligi joǵary tehnıkamen avtojoldardyń kúrdeli ýchaskelerinde patrýldeý júrgizip, kepteliste qalǵan kólikter men adamdarǵa kómek kórsetýde. Qutqarýshylar táýlik boıy jumys isteýdi jalǵastyryp jatyr, - dep jazdy TJM baspasóz qyzmetinen.
Óńirlerdegi qutqarý jumystary
Aqmola oblysynda «Astana – Petropavl» tasjolynda qozǵaltqyshy isten shyqqan «Petropavl – Shymkent» baǵytyndaǵy avtobýs toqtap qalǵan. 13 jolaýshy, onyń ishinde Qazaqstan, Ózbekstan jáne Qyrǵyzstan azamattary evakýatsııalanyp, Makınsk qalasyndaǵy jylytý pýnktine jetkizildi.
Batys Qazaqstan oblysynyń Syrym aýdanynda qar qursaýynda qalǵan jeńil avtokólikten bir otbasynyń úsh múshesi, onyń ishinde bala men júkti áıel qutqaryldy.
Abaı oblysynyń Aıagóz aýdanynda tehnıkalyq aqaýǵa baılanysty jolda qalǵan «Óskemen – Almaty» baǵytyndaǵy avtobýstan 28 adam, onyń ishinde 7 bala evakýatsııalandy.
Shyǵys Qazaqstan oblysynda «Óskemen – Tarǵyn – Samar» avtojolynda qar qursaýynda qalǵan úsh kólikten 10 adam, onyń ishinde eki bala shyǵaryldy.
Qaraǵandy oblysynda «Novosıbırsk – Shymkent» baǵytyndaǵy avtobýstan 15 jolaýshy, onyń ishinde 4 bala jylytý pýnktine jetkizildi.
Soltústik Qazaqstan oblysynda jol jıegindegi orǵa túsip ketken kólik súırelip shyǵaryldy.
Jetisý oblysynda Alakól jáne Sarqan aýdandarynda barlyǵy 17 adam evakýatsııalandy.
Aqtóbe oblysynda Temir aýdanynda qar qursaýynda qalǵan úsh adam qutqaryldy.
Pavlodar oblysynda dalada adasqan úsh er adam tabylyp, eldi mekenge jetkizildi.
Mańǵystaý oblysynda Beıneý aýdanynda joǵalyp ketken tórt azamat qar qursaýynan evakýatsııalandy.
Atyraý oblysynda Qurmanǵazy aýdanynda merziminen buryn dúnıege kelgen náreste men anasy 550 shaqyrymdyq qarly boran men kóktaıǵaqty eńserý arqyly aýdandyq aýrýhanaǵa jetkizildi.
Jambyl oblysynda qutqarýshylar qarǵa batyp qalǵan jedel járdem kóligine kómek kórsetip, medıtsına qyzmetkerin naýqasqa jetkizdi. Sonymen qatar Talas, Jýaly jáne Shý aýdandarynda qar qursaýynda qalǵan birneshe avtokólik shyǵaryldy.
TJM azamattardy daýyldy eskertýlerdi qadaǵalap, qolaısyz aýa raıy kezinde alys jolǵa shyqpaýǵa jáne qaýipsizdik sharalaryn saqtaýǵa shaqyrady.
Aıta keteıik, Almaty qutqarýshylaryna kúnine 3 myń qońyraý túsedi.