Qazaqstanda sońǵy alty jylda volonterlik uıymdar sany 4 ese ósti — Aıbek Dosymbetov
PETROPAVL. KAZINFORM — Al elimizde sońǵy jyldary belsendi volonterler sany alty ese ósip, 300 myńǵa jetti.
Bul týraly Petropavlda óńirlik kommýnıkatsııalar qyzmetinde ótken brıfıngte aıtyldy. Ulttyq volonterler front-ofısiniń basshysy Aıbek Dosymbetovtyń sózine qaraǵanda, Qazaqstanda volonterlik qozǵalystyń damyp kele jatyr. 2020 jyly 224 uıym bolsa, búginde onyń sany 810-ǵa jetken.
— Damýdyń negizgi baǵyttaryna toqtalsaq, óńirlermen áriptestik, halyqaralyq yntymaqtastyq jáne memlekettik organdarmen ózara is-qımyl basymdyqta. Volonterler sany artyp qana qoımaı, qatary túrli jas sanatyndaǵy adamdarmen tolyǵyp jatyr. Búginde óńirlerdegi basqarmalarmen memorandýmǵa otyrdyq. Jalpy, volonterlik qyzmet Konstıtýtsııalyq deńgeıde qorǵalady, — deıdi Aıbek Dosymbetov.
Mamandardyń aıtýynsha, búginde eriktilik qyzmet qaıyrymdylyqpen ǵana shektelmeı, áleýmettik qoldaý kórsetý, ekologııany qorǵaý, tótenshe jaǵdaılardyń saldaryn joıý, bilim berý, quqyqtyq jáne psıhologııalyq kómek kórsetý sekildi kóptegen baǵyttardy qamtyp otyr.
Soltústik Qazaqstan oblysynda qazir 10 myńnan astam volonter bar. Sonymen qatar 50-den astam volonterlik jáne qaıyrymdylyq uıymy tirkelgen, 20 bastamashyl top jumys isteıdi. Aýdandar men Petropavlda jastar resýrstyq ortalyqtarynyń janynan qurylǵan 14 volonterlik klýb jergilikti deńgeıdegi jumystardy úılestirip keledi.
SQO «BIRGEMIZ» volonterlik front-ofısiniń jetekshisi Anastasııa Volkovanyń aıtýynsha, óńirdegi volonterlerdiń qyzmeti 18 túrli baǵytty qamtıdy. Olardyń qatarynda áleýmettik, ekologııalyq, medıtsınalyq, sporttyq, oqıǵalyq, IT-volonterlik, donorlyq, kúmis volonterlik, janýarlarǵa kómek kórsetý, tótenshe jaǵdaılar kezindegi volonterlik jáne izdestirý jumystary bar.
— Áleýmettik volonterlik belsendi baǵyttardyń biri. «Birgemiz: Qamqor» jobasy aıasynda eriktiler jalǵyzilikti qarttarǵa, múgedektigi bar adamdarǵa jáne áleýmettik osal sanattaǵy turǵyndarǵa kómek kórsetedi. Volonterler azyq-túlik pen dári-dármek jetkizip, úı sharýasyna kómektesedi, qajetti keńester beredi. Bıylǵy jyldyń basynan beri ǵana 400-den astam volonterdiń qatysýymen 300-den astam adamǵa kómek kórsetildi, — deıdi Anastasııa Volkova.
Óńirde kásibı nemese pro bono volonterligi de damyp keledi. Zańgerler men psıhologtar turǵyndarǵa tegin keńes berip, áleýmettik osal toptarǵa qoldaý kórsetedi. Osy jyldyń alǵashqy bes aıynda túrli quqyqtyq máseleler boıynsha 18 zańgerlik keńes uıymdastyrylyp, toǵyz psıhologııalyq trenıng pen segiz jeke keńes ótkizilgen.
Buǵan deıin elde volonterdiń tsıfrlyq pasporty engiziletinin jazǵan edik.
