Qazaqstanda sońǵy 5 jylda 1840-tan astam aýyl sharýashylyǵy tehnıkasy óndirildi
ASTANA. KAZINFORM – Qazaqstanda CLAAS kompanııasynyń qatysýymen aýyl sharýashylyǵy tehnıkasyn óndirý kólemi sońǵy bes jylda 1840-tan asty.
Aýyl sharýashylyǵy mınıstrliginiń málimetinshe, joba aıasynda óndirilgen tehnıkanyń jalpy quny 242 mlrd teńgege jetip, bul ındýstrııalyq kooperatsııa men óndiristi jergiliktendirýdiń tıimdi úlgisine aınaldy.
Mınıstr Aıdarbek Saparov Germanııa ekonomıkasynyń Shyǵys komıtetiniń basqarma tóraıymy Katrına Klaas-Mıýlhoızermen kezdesý barysynda agrarlyq saladaǵy yntymaqtastyqty damytý máselelerin talqylady.
– Qazaqstan men Germanııa arasyndaǵy agrarlyq yntymaqtastyq joǵary qarqynmen damyp keledi. Ótken jyldyń qorytyndysy boıynsha agroónerkásiptik keshen ónimderiniń taýar aınalymy 23%-ǵa, eksport 38%-ǵa artty. Biz ózara saýdany ulǵaıtýǵa jáne ónim túrlerin keńeıtýge daıynbyz, – dedi Aıdarbek Saparov.
Kelissózder barysynda Qazaqstanda CLAAS aýyl sharýashylyǵy tehnıkasyn jergiliktendirý jobasynyń nátıjeleri erekshe atap ótildi. Joba 2021 jyldan beri CLAAS, CT AGRO jáne HORSCH kompanııalarynyń qatysýymen júzege asyrylyp keledi. Óndiris Soltústik Qazaqstan oblysy Petropavl qalasynda ornalasqan.
– Kásiporyn jylyna 370 ózdiginen júretin jáne 370 tirkemeli tehnıka shyǵarýǵa qaýqarly. Joba iske qosylǵaly beri 714 kombaın, 363 traktor, 270 egis kesheni jáne 500-ge jýyq jatka óndirildi. Bul aýyl sharýashylyǵy tehnıkasynyń zamanaýı úlgilerin el ishinde shyǵarýǵa múmkindik berip otyr, – delingen habarlamada.
Óz kezeginde Katrına Klaas-Mıýlhoızer Germanııa kompanııalarynyń Qazaqstandaǵy jobalarǵa qyzyǵýshylyǵy joǵary ekenin aıtyp, áriptestikti keńeıtýge daıyn ekenin jetkizdi.
Kezdesý qorytyndysynda taraptar óndiristi jergiliktendirýdi tereńdetý, tehnologııalar transferti jáne agroónerkásiptik saladaǵy ınvestıtsııalyq jobalardy iske asyrý boıynsha yntymaqtastyqty jalǵastyrýǵa ýaǵdalasty.
Aıta keteıik, keıingi 5 jylda aýyl sharýashylyǵy kooperatıvteriniń sany 53% ósken.
