Qazaqstanda soǵystan keıingi kartalarda asharshylyq qurbandary kómilgen 27 jer kórsetilgen- Maqash Tátimov
ATY. 31 mamyr. QazAqparat /Erlik Erjanuly/ - 1930 jyldardaǵy zulmatty náýbet deýge bolmaıdy. Ol qazaq tilin bilmeıtin adamdardyń sózi.
Saıası ǵylymdardyń doktory, demograf Maqash Tátimov keshe Almatyda ótken «Qazaqstannyń tarıhı demografııasyndaǵy aqtańdaqtar» dep atalatyn dóńgelek ústel jıynynda osylaı aıtty.
«Qazaqstanda soǵystan keıingi kartalarda 27 «kazgorodok» kórsetilgen. «Kazgorodok degen» - kontslagerler, onda kezinde ashtan qyrylǵan adamdar kómilgen. Qazir ár oblystan onyń bir-ekeýin tabýǵa bolady. Máselen, sonyń biri Almaty oblysyndaǵy Eńbekshiqazaq aýdanyndaǵy Rahat degen aýylda ornalasqan zırat. Alaıda áli kúnge deıin munda ashtan qyrylǵan adamdar jatyr degen eshqandaı belgi joq», - deıdi Maqash Tátimov. Onyń aıtýynsha, zulmat jyldary keı kezde kúnine 100 adamǵa deıin atylǵan. Olar keıin kez kelgen baq pen baýdyń arasyna kómilgen. Sondyqtan biz qazir olardyń keıbiriniń súıegi jatqan jerdi basyp júrýimiz de múmkin.
«HH ǵasyrdaǵy qoldan jasalǵan apattar týraly aıtylǵan kezde keıbireýler bul - náýbet deıdi. Ol qazaq tilin bilmeıtin adamdardyń sózi. Náýbet - dinı uǵym. Ótken ǵasyrdyń alashqy jartysynda eń aldymen din adamdary quǵyn-súrginge túskende olar ne úshin atylyp jatqanyn bilmegen soń náýbet keldi deýi múmkin. Shyn máninde bul qoldan jasalǵan saıası zulmat», - deıdi Maqash Tátimov.
Ǵalymnyń aıtýynsha, «kúshtep ujymdastyrý men aýqatty adamdardyń mal-múlkin tárkileýden keıin ýkraındardyń 17 paıyz qyryldy. Olar qazir ony qoldan jasalǵan asharshylyq dep memlekettik deńgeıde ózgelerge moıyndatty. Tipti birqatar elder bul saıası zulmatty moıyndamaǵandardy sotqa tartý týraly arnaıy zań shyǵaryp aldy. Al Qazaqstanda 49-51 paıyz qazaq asharshylyq qurbanyna aınalsa da biz áli ony ózge turmaq ózimiz tanyp-bile almaı otyrmyz».
