Qazaqstanda Sotsıalıstik Eńbek Eriniń járdemaqysy 360 myń teńgege jetkizilmek
NUR-SULTAN. QazAqparat – Qazaqstanda Sotsıalıstik Eńbek Eriniń járdemaqysy «Halyq Qaharmany» jáne «Qazaqstannyń Eńbek Eri» ataǵyn ıelenýshilerdiń járdemaqysymen teńestirilmek. Bul jaıynda Májilis depýtattarynyń saýalyna berilgen QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.
«Búgingi kúni Ekinshi dúnıejúzilik soǵysqa qatysýshylardyń qataryndaǵy Sotsıalıstik Eńbek Erleri úshin arnaýy memlekettik járdemaqy 74,65 AEK-ti nemese 197 898 teńgeni, «Eńbek dańqy» ordeniniń 3 dárejesine ıe Sotsıalıstik Eńbek Erleriniń járdemaqysy 9,60 AEK-ti nemese 25 450 teńgeni (2020 jyly) quraıdy. Sotsıalıstik Eńbek Erlerine belgilengen járdemaqyny qaıta qarastyrý usynysy ózekti ekendigi sózsiz. Osyǵan oraı Úkimet «Qazaqstan Respýblıkasynyń áleýmettik qamtamasyz etý máseleleri boıynsha keıbir zańnamalyq aktilerine ózgertýler men tolyqtyrýlar engizý týraly» QR zańynyń jobasyn ázirleýge bastama jasady. Onyń aıasynda Sotsıalıstik Eńbek Erleri men «Eńbek dańqy» ordeni ıegerleriniń qyzmetteri men jankeshti eńbekterin moıyndaý maqsatynda olarǵa beriletin arnaýly memlekettik járdemaqy kólemin «Halyq Qaharmany» men «Qazaqstannyń Eńbek Eri» ataǵyn ıelengenderge beriletin 138,63 AEK-ke nemese 367 508 teńgege (2020 jyly) deıin arttyrý sharalary qarastyrylǵan», - dep atap ótedi Úkimet basshysy.
Onyń aıtýynsha, qazirgi ýaqytta zań jobasynyń tujyrymdamasy ázirlenip, zań jobalaý qyzmeti máseleleri jónindegi vedomstvoaralyq komıssııa tarapynan maquldanǵan. Respýblıkalyq bıýdjettik komıssııa da memlekettik bıýdjetten qosymsha shyǵystarǵa qoldaý bildirip otyr.
«Atalǵan zań jobasy belgilengen tártippen memlekettik organdarda kelisim protsedýrasynan ótip jatyr jáne QR Úkimetiniń 2020 jylǵa arnalǵan zań jobalaý jumysy josparyna sáıkes, osy jyldyń sáýirinde QR Parlamenti qaraýyna engizý kózdelgen», - dedi Asqar Mamın.
