Qazaqstanda Sotsıalıstik Eńbek Eri ataǵy úshin beriletin járdemaqy mólsheri artady

NUR-SULTAN. QazAqparat – Qazaqstan Chernobyl AES-indegi apattyń zardaptaryn joıýǵa qatysýshylarǵa járdemaqy mólsheri artady. Bul týraly Parlament Májilisiniń jalpy otyrysynda QR Eńbek jáne halyqty áleýmettik qorǵaý mınıstri Birjan Nurymbetov málim etti, dep habarlaıdy QazAqparat tilshisi.

Búgin jalpy otyrysta «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaralyp, maquldandy.

«Arnaýly memlekettik járdemaqy týraly» Zańǵa engiziletin ózerister basqa memleketterdiń aýmaǵynda urys qımyldaryna qatysqan áskerı qyzmetshilerge arnaýly memlekettik járdemaqy belgileýdi, sondaı-aq zańnamalyq aktide qarastyrylǵan jekelegen sanattaǵy azamattarǵa járdemaqy mólsherin arttyrýdy kózdeıdi. Bul járdemaqyǵa baılanysty ózgerister sińirgen jáne janqııarlyq eńbekterin moıyndaý maqsatynda Sotsıalıstik Eńbek Erlerine, úsh dárejeli Eńbek Dańqy ordeniniń ıegerlerine, sondaı-aq beıbitshilik pen qaýipsizdikti qamtamasyz etý úshin qosqan úlken úlesteri úshin 1988-1989 jyldary Chernobyl AES-indegi apattyń zardaptaryn joıýǵa qatysýshylarǵa qatysty», - dedi mınıstr.

Onyń sózine qaraǵanda, búginde qoldanystaǵy zańnamaǵa sáıkes memleketten jeńildikter men kepildikter alatyn ardagerlerimizdiń sany 169 myń bolsa, qosymsha kózdelip otyrǵan ardagerlermen birge memlekettik qoldaý sharalarymen 180 myńnan astam ardager qamtylatyn bolady.

Mınıstrliktiń málimetinshe, 1988-1989 jyldary Chernobyl AES-indegi apattyń zardaptaryn joıýǵa qatysqan adamdarǵa arnaýly memlekettik járdemaqy mólsherin 2,13 AEK-ten (2020 jyly-5 647 teńge) 4,8 AEK-ke deıin (2020 jyly-12 725 teńge) arttyrý usynylady.

Budan basqa, áleýmettik ádilettilik qaǵıdatyn qamtamasyz etý maqsatynda Sotsıalıstik Eńbek Erleri úshin beriletin arnaıy memlekettik járdemaqylardyń mólsherin qaıta qaraý usynyldy.

2019 jyldaǵy 1 qańtarynan bastap «Qazaqstannyń Eńbek Eri» ataǵyna ıe bolǵan adamdar úshin 138,63 aılyq eseptik kórsetkish mólsherinde arnaıy memlekettik járdemaqy engizildi (2019 jyly – 350041 teńge). Bul «Qazaqstannyń Eńbek Eri» ataǵyn alǵan adamdarda jáne ótken jyldary eldiń damýyna eleýli úles qosqan Sotsıalıstik Eńbek Erlerine járdemaqy mólsherindegi edáýir aıyrmashylyqtarǵa alyp keldi. Osyǵan baılanysty Ekinshi dúnıejúzilik soqysǵa qatysýshylar qatarynan Sotsıalıstik Eńbek Erleri, sondaı-aq Sotsıalıstik Eńbek Erleri úshin járdemaqy mólsherin 74,65 jáne 9,6 AEK – ten 138,63 AEK-ke deıin (2020 jyly-367 508 teńge) arttyrý usynyldy.

Budan buryn habarlanǵandaı, búgin Parlament Májilisiniń jalpy otyrysynda «Ardagerler týraly» zań jobasy birinshi oqylymda maquldandy.