Qazaqstanda «Smart Turmys» júıesi kommýnaldyq qyzmetter sapasyn jaqsartady
ASTANA. KAZINFORM – Qazaqstanda «Energetıkalyq jáne kommýnaldyq sektorlardy jańǵyrtý» ulttyq jobasyn júzege asyrý aıasynda 2026 jyly kommýnaldyq qyzmetterdiń senimdiligi men sapasyn arttyrýǵa baǵyttalǵan jobalardy iske asyrý qarqyndy jalǵasyp jatyr. Bul týraly Ulttyq ekonomıka mınıstrliginiń Tabıǵı monopolııalardy retteý komıteti habarlady.
Qajetti normatıvtik-quqyqtyq baza jasaqtaldy: zańnamaǵa jáne oǵan táýeldi normatıvtik aktilerge ózgerister engizilip, jobalardy tıimdi júzege asyrý men ınvestıtsııa tartýǵa jaǵdaı jasaldy. 2025 jyldyń qorytyndysy boıynsha Shymkent qalasy, Túrkistan, Soltústik Qazaqstan, Qaraǵandy, Pavlodar jáne Jetisý oblystarynda 6 pılottyq joba iske asyrylyp, elektr jáne jylýmen jabdyqtaýdyń senimdiligi artty, jelilerdiń tozýy tómendedi. Sondaı-aq keı óńirlerde elektr energııasyn óndirý kólemi ulǵaıdy.
Jańǵyrtý jumystarynyń nátıjeleri qyzmet sapasyn jaqsartýǵa jáne apattylyq deńgeıin tómendetýge tikeleı áser etkendigi anyqtaldy. 2026 jyly bul baǵyttaǵy jumystar jalǵasyp, taǵy 8 tabıǵı monopolııa sýbektisi ınfraqurylymnyń joǵary táýekel aımaǵynan shyǵýy josparlanyp otyr. Bul kommýnaldyq júıelerdiń senimdiligi men turaqtylyǵyn arttyrýǵa múmkindik beredi.
2026 jyly ınvestıtsııalyq komponent kúsheıtildi. Qazirgi ýaqytta ulttyq jobanyń elektrondyq platformasynda respýblıka boıynsha 206 joba tirkelip, olar satyp alý rásimderin ótkizýge daıyn tur. Sonymen qatar jylýmen jabdyqtaý jáne kommýnaldyq ınfraqurylymdy jańǵyrtý baǵytynda jalpy somasy 23 mlrd teńgege sharttar jasaldy («Lısakovskgorkommýnenergo» ÓShB» MKK, «Teplotranzıt Karaganda» JShS, «Abaılyq jylý júıeleri» JShS).
Qarjy ınstıtýttary arqyly kommýnaldyq ınfraqurylymdy jańǵyrtý jobalary iske asyrylýda. Mysaly, Qazaqstannyń Damý Banki «Karaǵandy Jaryq» JShS-niń elektr jelilik ınfraqurylymdy jańartý jobasyna 16,7 mlrd teńge bóldi. Sonymen qatar «Qazaqstandyq turǵyn úı kompanııasy» AQ arqyly Qaraǵandy, Batys Qazaqstan jáne Pavlodar oblystarynda jalpy somasy 22,2 mlrd teńgeni quraıtyn 11 joba qarjylandyryldy. Bul sharalar ınfraqurylymnyń tozýyn azaıtýǵa, energııamen jabdyqtaýdyń senimdiligin arttyrýǵa jáne qyzmet kórsetý sapasyn jaqsartýǵa baǵyttalǵan.
Salany tsıfrlandyrý da mańyzdy baǵyt sanalady. Elektrondyq satyp alý platformasy damytylýda, sondaı-aq protsesterdiń ashyqtyǵyn arttyrý, basqarý tıimdiligin kúsheıtý jáne kommýnaldyq qyzmetterdi alý yńǵaılylyǵyn qamtamasyz etý maqsatynda «Smart Turmys» júıesi engizilip jatyr.
Memlekettik tarıftik saıasat áleýmettik baǵyttylyǵyn saqtap otyr. Halyqty qoldaý úshin turǵyn úı kómegi tetigi jumys isteıdi, ol kommýnaldyq qyzmetterge jumsalatyn shyǵyndar otbasynyń jıyntyq tabysyna qatysty belgilengen deńgeıden asqan jaǵdaıda ótemaqy tóleýge múmkindik beredi. 2025 jyldyń qorytyndysy boıynsha bul kómekti 10 myńnan astam otbasy aldy.
Osylaısha, 2026 jyly ulttyq jobany júzege asyrý belsendi kezeńge kóship, ınfraqurylymnyń tozýyn tómendetý, energııamen jabdyqtaýdyń senimdiligin arttyrý jáne kommýnaldyq qyzmetterdiń sapasyn jaqsartý baǵytyndaǵy jumystar jalǵasady.
Eske sala keteıik, buǵan deıin 2030 jylǵa qaraı kommýnaldyq jelilerdiń tozýyn 40%-ǵa deıin tómendetý josparlanyp otyrǵanyn jazǵan edik.
