Qazaqstanda slovakııalyq kásipkerlerge qolaıly jaǵdaı jasalǵan - Peter Pellegrını
ASTANA. QazAqparat - Búgin Qazaqstan-Slovakııa bıznes-forýmynda QR Premer-Mınıstri Baqytjan Saǵyntaev eki eldiń arasyndaǵy saýda-ekonomıkalyq yntymaqtastyqty damytý úshin barynsha qoldaý jasalatynyn málim etti, dep habarlaıdy QazAqparat.
«Slovakııa Ortalyq Eýropadaǵy Qazaqstannyń mańyzdy seriktesteriniń biri bolyp otyr. Bizdi baılanystyratyn ortaq basymdyqtar kóp. Osy oraıda ekonomıkanyń ındýstrıaldyq-agrarlyq baǵyty, damyǵan adamı kapıtal, tıimdi geografııalyq ornalasý sekildi uqsastyqtar bar. Bıyl biz eki eldiń arasynda dıplomatııalyq qatynastardy ornatýdyń 25 jyldyǵyn atap ótýdemiz. Qazaqstan men Slovakııa arasyndaǵy dostyq pen seriktestiktiń osy merziminde senimdi saıası dıalog qalyptasyp, saýda-ekonomıkalyq ári mádenı-gýmanıtarlyq yntymaqtastyqty damytý úshin qolaıly jaǵdaılar jasaldy», - dedi B. Saǵyntaev.
Bul turǵyda Úkimet basshysy saýda-ekonomıkalyq saladaǵy baılanystarda jaqsy qarqyn baıqalyp jatqandyǵyn aıta kele, búginde Qazaqstanda slovakııalyq kapıtaldyń qatysýymen 60-tan astam kásiporyn tirkelgenin jetkizdi.
«Biz aldaǵy ýaqytta da saýda-ekonomıkalyq ári ınvestıtsııalyq qatynastardy keńeıtýge múddelimiz. Ol úshin bizde barlyq jaǵdaılar jasalǵan. Búginde Qazaqstan tıimdi bıznes júrgizýde jańa múmkindikter men aýqymdy áleýettiń memleketine aınaldy. Bizdiń EAEO múshesi ekenimizdi bilesizder, bul rette 180 mıllıon adamdy qamtyp turǵan úlken naryq bar», - dedi Baqytjan Saǵyntaev.
Sonymen qatar ol birlesken jumystardy júrgizýge qos taraptyń da isker toptary qyzyǵýshylyq tanytyp otyrǵandyǵyn atap ótti.
Óz kezeginde Slovakııa Premer-Mınıstri Peter Pellegrını eki el arasyndaǵy ózara ekonomıkalyq qatynastardy damytýǵa múddeli ekendikterin jetkizdi. Sondaı-aq ol slovakııalyq kásipkerlerge Qazaqstanda qolaıly jaǵdaılar jasalǵanyn da rastady.
«Biz ekonomıkalyq baılanystardy talqylaǵan kezde, Qazaqstan Slovakııa úshin Ortalyq Azııa óńirinde basymdyqqa ıe ekenin atap ótken jón. Yntymaqtastyqty nyǵaıtýda jańaratyn energetıka, avtomobıl ónerkásibi, mashına jasaý, sýdy tazartý tehnologııasy, azyq-túlik ónimderin óndirý sekildi salalardyń áleýeti joǵary», - dedi P. Pellegrını.
Taratylǵan málimetterge qaraǵanda, Qazaqstan men Slovakııa arasyndaǵy syrtqy saýda aınalymy 2018 jyldyń 8 aıynda 13,9 paıyzǵa ósip, 33,5 mln AQSh dollaryna jetti.
