Qazaqstanda iskerlik belsendilik turaqty deńgeıde — Ulttyq bank
ASTANA. KAZINFORM — Qyrkúıek aıynda eldegi iskerlik belsendilik oń serpinin joǵaltpaı, turaqtylyǵyn saqtap otyr. Ulttyq Bank jarııalaǵan derekterge sáıkes, negizgi salalardaǵy kórsetkishter turaqtylyq pen birqalypty ósimdi kórsetip otyr. Bul týraly Ulttyq bank málim etti.
Ásirese óndiris, qyzmet kórsetý jáne saýda salalarynda oń dınamıka baıqalsa, qurylys pen taý-ken ónerkásibindegi jaǵdaı birtindep jaqsaryp keledi. Bul makroekonomıkalyq jaǵdaıdyń birshama turaqtanǵanyn jáne kásiporyndardyń iskerlik belsendilikke degen seniminiń saqtalyp otyrǵanyn bildiredi.
Eldegi iskerlik belsendilik týraly QUB Aqsha-kredıt saıasaty departamentiniń dırektory Rústem Orazalınniń túsindirmesinde aıtylǵan.
2025 jyldyń qyrkúıek aıynda iskerlik belsendilik 50,9 (tamyzda 51,0) bolyp, ózgerissiz qaldy. Indıkator 2024 jylǵy naýryzdan bastap oń aımaqta tur.
— Óndiriste, qyzmet kórsetý sektorynda jáne saýdada belsendilik saqtaldy, onda ındeks tıisinshe 53,0, 51,0 jáne 50,8 (tamyzda — 53,8, 51,2 jáne 51,2) bolyp, ósý jaǵynda qaldy. Qurylys pen taý-ken óndirý ónerkásibinde kórsetkishter teris aımaqta qalǵanyna qaramastan, 49,5-ke jáne 49,3-ke deıin (tamyzdaǵy 48,1 men 48,3-ten) jaqsarǵany baıqaldy, — delingen habarlamada.
Kórsetkish máni 50-den joǵary bolsa — oń ózgeristi, tómen bolsa — keri ózgeristi bildiredi. Indeks máni 50-den qanshalyqty alshaq (joǵary nemese tómen) bolsa, kórsetkishtiń ósý qarqyny (artýy nemese kemýi) soǵurlym joǵary bolady.
Ulttyq banktiń dereginshe, kásiporyndardyń bıznes júrgizýdiń qazirgi jáne keleshek jaǵdaıyn baǵalaýy nasharlaýy sebepti 2025 jylǵy qyrkúıekte bıznes-ahýal ındeksi (BAI) tómendep, 10,3 boldy. Alaıda, jalpy kórsetkishter oń baǵalanyp otyr, tıisinshe bıznes-tsıkl «saǵatynyń» ındıkatory ósý jaǵynda qaldy.
Kásiporyndardyń baǵalaýy boıynsha, olardyń ónimine/kórsetiletin qyzmetine suranys ósti, biraq qarqyny baıaý. Eń kóp suranys óndiriste boldy.
Buǵan deıin habarlanǵandaı, Qazaqstan Ulttyq Banki sarapshylar qaýymdastyǵy arasynda júrgizilgen kezekti makroekonomıkalyq saýalnamanyń nátıjesine saı, Qazaqstandaǵy ınflıatsııa men bazalyq mólsherleme ósýi yqtımal.