Qazaqstanda syrtqy elektrondyq saýda boıynsha «pılottyq joba» uzartyldy
ASTANA. KAZINFORM — Qazaqstan Respýblıkasynda 2023 jylǵy 4 shildeden bastap, 2021 jylǵy 5 sáýirdegi Eýrazııalyq ekonomıkalyq komıssııa keńesiniń № 7 qaýlysymen iske qosylǵan syrtqy elektrondyq saýda salasyndaǵy pılottyq joba júzege asyrylyp jatyr.

QR QM Memlekettik kirister komıtetiniń málimetinshe, joba elektrondyq saýda taýarlaryn kedendik shekara arqyly halyqaralyq poshta jóneltilimderi men ekspress-jetkizilimder arqyly ákelý kezinde kedendik ákimshilikti jáne taýarlardy deklaratsııalaýdy jeńildetýge baǵyttalǵan. Onyń sheńberinde elektrondyq saýda operatory retinde «Qazposhta» AQ áreket etedi, ol taýarlardy kedendik qoıma (bond qoımasy modeli) arqyly da, «tikeleı» jetkizý kezinde de alýshylar — jeke tulǵalar atynan kedendik deklaratsııalaýdy júzege asyrady.
Pılottyq jobany iske asyrý úshin Qazaqstan Respýblıkasynyń «Qazaqstan Respýblıkasynda kedendik retteý týraly» Kodeksine tıisti ózgerister engizildi:
— 45-1-taraý qosylyp, elektrondyq saýdanyń taýarlaryn kedendik deklaratsııalaý jáne shyǵarý erekshelikteri belgilendi;
— 544-bapqa ózgerister engizilip, pılottyq jobanyń ótkizý merzimi 2024 jylǵy 31 jeltoqsanǵa deıin shekteldi.
2024 jylǵy maýsymda sheńberinde «Qazposhta» AQ-nyń (Poshtalyq esep júıesi AJ) jáne memlekettik kirister organdarynyń («ASTANA-1» AJ) aqparattyq júıeleri ıntegratsııalandy. Bul kedendik operatsııalardy aıtarlyqtaı jedeldetýge jáne avtomattandyrýǵa múmkindik berdi.
— Jobanyń oń nátıjelerin eskere otyryp, ony ótkizý merzimi 2025 jylǵy 10 aqpandaǵy № 164-VIII Qazaqstan Respýblıkasy Zańymen uzartyldy. Osy zańǵa sáıkes, EAEO kedendik aýmaǵynda syrtqy elektrondyq saýda boıynsha EAEO Keden kodeksi týraly Shartqa ózgerister engizý jónindegi Hattama men Eýrazııalyq ekonomıkalyq komıssııanyń tıisti aktileri kúshine engenge deıin jalǵasady. Qazaqstanǵa kedendik ákimshilikti odan ári tsıfrlandyrýǵa jáne syrtqy elektrondyq saýda qatysýshylary úshin yńǵaıly jaǵdaılar jasaýǵa múmkindik beredi, — delingen habarlamada.
Buǵan deıin Memlekettik kirister komıteti zańsyz aktsızdik ónimge qatysty tekseris qorytyndysyn jarııalaǵanyn jazdyq.