Qazaqstanda syrt kıimdi tómen baǵada qaıdan satyp alýǵa bolady
Kazinform agenttiginiń tilshisi óńirlerdegi jyly kúrte, ishik, ton baǵasyn salystyrdy.
Kúz túskende Qazaqstandaǵy saýda oryndaryna syrt kıimniń kúz-qys maýsymyna arnalǵan toptamasy túsip jatyr. Termometr baǵamy tómendegen saıyn dúkenderde kezek te kóbeıedi.
Qazirgi kezde býtıkterde syrt kıimge tańdaý joǵary. Jyly kúrte men ishik, tondy talǵamyńyzǵa qaraı taba alasyz. Maýsym jaqyndaǵan saıyn baǵada ózgeshelik bar.
Satýshylardyń aıtýynsha, ásirese qazan-jeltoqsan aılary arasynda suranys joǵary bolady. Dál osy shaqta tasymaldaýshylar baǵany kóteredi. Bul maýsymdyq suranysqa baılanysty.
Baǵa kóbine syrt kıimniń neden tigilgenine baılanysty ózgerip otyrady. Teriden tikse qymbat, al jasandy teri buıymdarynyń baǵasy tómen. Sol sekildi jyly kúrtege mamyq salsa baǵa joǵary, sıntetıkalyq materıaldan tikse quny tómen.
Sonymen birge syrt kıim baǵasyna valıýta baǵamy áser etedi. Sebebi teri, bylǵary jáne kıimniń ishin toltyrýǵa qajetti materıaldyń bári syrttan ákelinedi. Logıstıka da baǵaǵa óz áserin tıgizip tur. Al Qazaqstanda kólik tasymaly shyǵyny byltyrǵyǵa qaraǵanda 10–15%-ǵa ósti.
Sonymen birge baǵaǵa kıim tigetin tseh ataýy da áser etedi. Túrli brend ton men jyly kúrte baǵasy jergilikti taýar óndirýshiler tikken syrt kıimderge qaraǵanda qymbat. Al sapasynda kóp aıyrmashylyq baıqalmaıdy.
Bir sózben aıtqanda, satyp alýshy tek taýar materıalyna ǵana emes, marketıng, dızaın men brend ımıdjine de tóleıdi. Al jergilikti fabrıkalar otyndyq materıaldardan ishik pen kúrte tigip satsa, baǵa ımport taýarǵa qaraǵanda 20—30% tómen bolady.
Jeltoqsan aıynyń aıaǵynda suranys báseńdep, jappaı satylym bastalady. Sol kezde jyly kúrte men ton baǵasy ádettegiden 40% tómendep, aqshany únemdeýge bolady. Salqyn túse bastaǵanda baǵa joǵary bolsa, al qystyń qaq ortasynda qun áldeqaıda tómendeıdi.
Qazaqstan boıynsha Oral qalasynda jyly kúrte baǵasy áldeqaıda tómen. Quny 15 myń teńgeden bastalady. Al Shymkent ( 20 myń teńgeden bastalady), Qostanaı (25 myń tg), Kókshetaý, Almaty men Astanada (30 myń tg) baǵa odan sál joǵary. Taraz, Pavlodar men Aqtóbede jyly kúrte quny orta eseppen 35 myń teńge bolyp tur.
Qaraǵandy (40 myń tg bastalady), Semeı (47 myń tg) jáne Óskemende (48 myń tg) baǵa ósip tur. Al Petropavl, Jezqazǵan, Taldyqorǵan men Qyzylordada baǵa joǵary. Munda jyly kúrteniń eń arzany — 50-60 myń teńge.
Al ton baǵasy boıynsha Qostanaı alda tur. Mundaǵy baǵa qoljetimdi. Tipti jasandy materıaldan tikken tondy 9 myń teńgege satyp alýǵa bolady. Al eń qymbaty Petropavl qalasynda satylyp jatyr. Munda keıbiriniń baǵasy 300-400 myń teńgege deıin jetedi. Al Aqtóbe, Qyzylorda, Shymkent, Pavlodar, Kókshetaý men Astanada baǵa ortasha. Munda 25-30 myń teńgege ton satyp alýǵa bolady.
Taraz, Oral, Semeı men Qaraǵandyda baǵa odan sál joǵary. Qazir 40 myń teńgeden bastalyp tur. Jezqazǵan (50 myń teńgeden bastalady), Óskemen (56 myń tg), Almaty (65 myń tg) jáne Taldyqorǵanda (70 myń tg) baǵa joǵary. Tonnyń eń qymbatynyń baǵasy 500 myń teńgege deıin barady.
Syrt kıimniń eń qymbaty — ishik. Eger taza teriden tikse, sapasyna qaraı quny da óse beredi. Qazirgi kezde adamdar taza teriden tigilgenin emes, jasandy teri buıymyn tańdaıdy. Ondaı syrt kıimniń baǵasy qoljetimdi. Baǵaǵa ishiktiń uzyndyǵy da áser etedi.
Іshiktiń arzany Qostanaı qalasynda satylady. Baǵasy 15 myń teńgeden bastalady. Oral, Taldyqorǵan men Shymkentte ortasha baǵa — 20-25 myń teńge. Taraz, Qyzylorda men Aqtóbede (30-35 myń teńge) qoljetimdi. Al elimizdiń soltústigi men ońtústik astanada baǵa 45-49 myń teńge aralyǵynda.
Qaraǵandy, Jezqazǵan, Kókshetaý men Pavlodarda baǵa 50 myń teńge jáne odan joǵary. Al ishiktiń eń qymbaty Semeı (60 myń tg), Óskemen (65 myń tg) jáne Petropavl (80 myń tg) qalalarynda satylyp jatyr. Bul syrt kıimniń baǵasy keıde mıllıon teńge deıin jetedi.
Buǵan deıin UBT-ǵa daıyndyq kýrsynyń baǵasyn jazdyq.