Qazaqstanda Sırııadan qaıtarylǵan adamdarǵa qatysty fılm túsirilýi múmkin
ASTANA. QazAqparat - Parlament Májilisiniń depýtaty Qýanysh Sultanov «Jýsan» operatsııasy negizinde derekti, patrıottyq tárbıedegi kórkem fılm túsirý týraly usynys jasady. Osyǵan baılanysty QR Premer-Mınıstri Baqytjan Saǵyntaevtyń atyna depýtattyq saýal joldandy, dep habarlaıdy QazAqparat.
«Jańa jyldyń alǵashqy aptasy QR Prezıdenti Nursultan Ábishuly Nazarbaevtyń Sırııadan bizdiń elden aldaý joldarymen shyǵarylǵan jáne terrorısterde tutqynda bolǵan 11 áıel, 30 bala barlyǵy 47 adamnyń óz Otanyna qaıtarylýy boıynsha «Jýsan» gýmanıtarlyq operatsııasynyń sátti atqarylǵany týraly erekshe ári júrekke jyly tıetin Málimdemesimen este qaldy. Prezıdent mundaı qaıyrymdylyq ári gýmanızm aktisine bastamashy bolý arqyly Qazaqstan azamattarynyń qaı jerde bolsa da olardyń taǵdyryna degen qamqorlyǵy men alańdatýshylyǵyn kórsetti. Operatsııa qalaı daıyndalǵandyǵy jáne qandaı qıyndyqtar men qaýip-qaterlerdi ótkergendigi týraly maǵlumat tek Prezıdent pen naqty oryndaýshylarǵa ǵana málim, munyń ózi qurmetke laıyq», - dep toqtaldy Qýanysh Sultanov.
Osy oraıda ol eń bastysy - adamdar, bizdiń otandastarymyz qutqarylǵanyn atap ótti.
«Al bizdiń jastardyń sanasy kınozaldardyń, elektrondyq qurylǵylardyń ekrandarynan patrıotızmnen basqa qajetsiz nárseniń barlyǵymen aıaýsyz ýlanyp jatyr. Memleket basshysynyń arnaıy tapsyrmasymen joǵary deńgeıde júzege asyrylǵan qazaqstandyq azamattardy qutqarý operatsııasy sekildi erekshe oqıǵalar óskeleń urpaqqa patrıottyq tárbıe beretin joǵary kórkemdik kıno túsirýge tamasha sıýjet bolar edi», - dedi depýtat.
Osyǵan baılanysty Q. Sultanov birneshe usynysyn jarııalady.
Bul rette memlekettik tapsyrys boıynsha «Jýsan» operatsııasy negizinde shytyrman oqıǵaly, derekti, patrıottyq tárbıedegi kórkem fılm túsirý qajettigi aıtyldy.
«Prezıdenttiń ústimizdegi jyldy Jastar jyly dep jarııalaýyna baılanysty jastardyń rýhanı jáne patrıottyq tárbıesi jalpy memlekettik múdde bolǵandyqtan, jastardyń patrıottyq ári rýhanı tárbıesiniń keshendi jospary men sharalaryn qarastyrý jón bolar edi», - dedi ol.
Esterińizge sala keteıik, jaqynda Qazaqstan Prezıdenti Nursultan Nazarbaev Qazaqstan azamattaryn Sırııadan evakýatsııalaýǵa baılanysty málimdeme jasaǵan bolatyn. Memleket basshysy óz sózinde atap ótkendeı, 6 qańtarda quqyq qorǵaý organdary men Syrtqy ister mınıstrligi júrgizgen gýmanıtarlyq shara nátıjesinde Sırııadan 47 azamatymyz, sonyń ishinde 30 bala elimizge qaıtarylǵan.
