Qazaqstanda sırek metaldardyń 935 myń tonnadan astam qory anyqtaldy
ASTANA. KAZINFORM — Qazaqstandaǵy perspektıvaly ýchaskelerde sırek jáne sırek jer metaldarynyń 935,4 myń tonna boljamdy resýrsy anyqtaldy. Bul týraly geologııalyq barlaý jumystarynyń nátıjeleri boıynsha belgili boldy.
Úkimettiń baspasóz qyzmetiniń habarlaýynsha, geologııalyq barlaýdyń negizgi baǵyttarynyń biri — ónerkásip pen jańa tehnologııalardy damytýǵa qajetti strategııalyq paıdaly qazbalardy izdeý. Olardyń qatarynda altyn, mys, polımetaldar, lıtıı, volfram, molıbden jáne sırek ári sırek jer metaldary bar.
Qazaqstanda bul baǵytta birqatar iri ken oryndary bar. Máselen, volframnyń negizgi qory Qaraoba ken ornynda ornalasqan. Lıtıı boıynsha Qaraǵaılyaktas, Ahmetkıno jáne Ahmırovskoe nysandary perspektıvaly sanalady. Molıbdenniń iri ken oryndary Qaraǵandy oblysynda shoǵyrlanǵan. Olardyń qatarynda Kóktenkól, Joǵarǵy Qaıraqty jáne Soltústik Qatpar bar. Al Abaı oblysyndaǵy mańyzdy nysandardyń biri — Aıdarly.
Qazirgi tańda izdeý baǵdarlamasyna engizilgen 11 ýchaskede zertteý jumystary aıaqtalǵan. Olardyń ishindegi eń perspektıvalysy retinde Qaraǵandy oblysyndaǵy Kúırektikól ýchaskesi ataldy.
Júrgizilgen zertteýler nátıjesinde munda lantan (La), tserıı (Ce), neodım (Nd) jáne ıttrıı (Y) sııaqty sırek jer metaldarynyń eleýli boljamdy resýrstary anyqtalǵan. Barlyq ýchaske boıynsha boljamdy resýrstardyń jıyntyq kólemi 935,4 myń tonna boldy.
Sonymen qatar Yrǵyz alańynda S2 sanaty boıynsha 795,8 myń tonna qor esepteldi. Budan bólek, Keńqudyq, Rjavaıa Sopka, Mırolıýbovskıı, Boqaı jáne Kýneoı ýchaskelerindegi sırek jáne sırek jer metaldarynyń áleýeti baǵalandy.
— Sırek metaldar qazirgi zamanǵy tehnologııalar men perspektıvaly óndirister úshin mańyzdy shıkizat sanalady. Olardyń qoryn anyqtaý Qazaqstannyń ónerkásiptik jáne tehnologııalyq áleýetin arttyrýǵa múmkindik beredi, — delingen Úkimettiń baspasóz qyzmeti taratqan habarlamada.
Eske salaıyq, buǵan deıin 2024-2025 jyldary Qazaqstanda 54 jańa ken orny memlekettik esepke alynǵanyn habarlaǵan edik.
