Qazaqstanda sırek metaldar ken oryndary aýktsıonǵa shyǵarylady

ASTANA. KAZINFORM — Elimizde kúmis, kómir jáne sırek kezdesetin metaldardyń 50 ken orny boıynsha elektrondyq aýktsıon uıymdastyrylady.

Bul týraly Ónerkásip jáne qurylys vıtse-mınıstri Iran Sharhan málim etti.

— Aldaǵy ýaqytta altyn, kúmis, kómir jáne sırek kezdesetin metaldardyń 50 ken orny boıynsha elektrondyq aýktsıon ótkizý josparda bar. Bul perspektıvaly nysandarǵa qoljetimdilikti odan ári keńeıtedi. Sonymen qatar, biz tek qana mıneraldyq-shıkizat bazasyn keńeıtip qoımaı, jer qoınaýyn paıdalaný modelin qaıta qaraýymyz qajet. Qazaqstan «óndirý–óńdeý–qaldyqtar» sııaqty syzyqtyq úlgiden birtindep bas tartyp, aınalmaly (tsırkýlıarlyq) ekonomıkaǵa bet buryp keledi. Elde 55 mlrd tonnadan astam tehnogendik mıneraldyq túzilimder shoǵyrlanǵan, qazir olardy túgendeý jáne óndiristik aınalymǵa tartýǵa daıyndyq jumystary júrip jatyr, — dedi Iran Sharhan elordada ótip jatqan 15-i halyqaralyq taý-ken metallýrgııa kongresinde.

Sondaı-aq vıtse-mınıstr jasyl ekonomıkaǵa kóshý, tsıfrlandyrý jáne elektromobılderdiń damýy metaldarǵa degen suranys qurylymyn túbegeıli ózgertip jatqanyn aıtty. 

Buǵan deıin habarlaǵanymyzdaı Qazaqstan altyn qory boıynsha TOP-20 eldiń qataryna kirdi.

Sondaı-aq jaqyn arada taý-ken kesheni salasynda 3,5 trln teńgege 5 ınvestıtsııalyq joba iske qosylady dep kútilip otyr. 

Aıta keteıik, elordada halyqaralyq taý-ken metallýrgııa kongresi ótip jatyr. Oǵan álemniń 20 elinen 1300 delegat qatysty.