Qazaqstanda sırek metaldar boıynsha ulttyq zerthana qurylady
ASTANA.KAZINFORM – Qazaqstanda strategııalyq mańyzy bar materıaldardy ıgerýdi damytý jáne ımportqa táýeldilikti azaıtý maqsatynda ulttyq zerthana qurý josparlanyp otyr. Bul týraly Úkimet otyrysynda QR Ónerkásip jáne qurylys vıtse-mınıstri Iran Sharhanuly málimdedi.
– Ónerkásip salasynda negizgi basymdyq tehnologııalyq táýelsizdikti qamtamasyz etýge, otandyq óndiristi damytýǵa jáne memlekettik qoldaýdyń tıimdiligin arttyrýǵa baǵyttalady, – dedi ol.
Vıtse-mınıstrdiń aıtýynsha, sırek jáne sırek jer metaldaryn qosa alǵanda, strategııalyq mańyzy bar materıaldardyń tizbesin qalyptastyrý úshin arnaıy komıssııa qurý kózdelgen.
– Elimizdiń álemdik óndiristik tizbekterge qatysýyn keńeıtip, osy maqsatta mańyzdy materıaldar boıynsha ulttyq zerthana qurý josparlanýda. Bul shıkizat qorlaryn ıgerýdi damytýǵa jáne ımportqa táýeldilikti azaıtýǵa múmkindik beredi, – dedi Iran Sharhanuly.
Sonymen qatar óndiristik qýattardy naryq qajettilikterine saı damytý jáne memlekettik qoldaýdyń tıimdiligin arttyrý úshin óndiristik balansty baǵalaý ádistemesi bekitilgen. Ol jańa jobalardyń qoldanystaǵy kásiporyndarǵa yqpalyn baǵalaýǵa múmkindik beredi.
Onyń aıtýynsha, «Halyqtyq qurylys» baǵdarlamasy aıasynda qurylys materıaldary naryǵyna taldaý júrgizilip, otandyq óndiristi keńeıtý baǵyttary aıqyndalady.
– Sonymen qatar qurylysta otandyq materıaldardy ımporttyq ónimdermen negizsiz almastyrýǵa jol bermeý sharalary kózdeletin bolady, – dep atap ótti vıtse-mınıstr.
Budan bólek, iri kásiporyndar aınalasynda jetkizýshiler ekojúıesin qalyptastyrý, retteletin satyp alýlarda qazaqstandyq taýar óndirýshilerdi qoldaý jáne óndiristik kooperatsııany damytý jumystary júrgiziledi. Sondaı-aq túpkilikti ónim óndirýdi yntalandyrý men ónerkásiptik klasterlerdi damytý modeli ázirlenip jatyr.
Qurylys jáne kommýnaldyq ınfraqurylym salasyndaǵy basym baǵyttardyń biri – sýdy tıimdi paıdalaný.
– Sýdy kóp tutynatyn iri kásiporyndardy aınalym jáne qaıta paıdalanatyn sýmen jabdyqtaý júıelerine kóshirý kózdelip otyr. Bul baǵytta halyqaralyq tájirıbe negizinde qoljetimdi tehnologııalar qarastyrylyp, iri sý tutynatyn kásiporyndarǵa taldaý júrgiziledi jáne zańnamaǵa qajetti ózgerister ázirlenedi, – dedi ol.
Aýyldyq eldi mekenderdi sapaly ári úzdiksiz sýmen qamtamasyz etý máselesine de basymdyq beriledi. Vıtse-mınıstrdiń sózinshe, endigi mindet – aýyzsýdyń turaqty berilýin, qyzmet sapasyn jáne salynǵan nysandardyń úzdiksiz jumys isteýin qamtamasyz etý.
Osy maqsatta jergilikti atqarýshy organdar aýyldardaǵy sýmen jabdyqtaý júıeleriniń jaǵdaıyn zerdelep, sý berýi turaqsyz eldi mekenderdi anyqtaıdy.
Vıtse-mınıstr aýqymdy qurylys jobalaryn iske asyrý jáne qurylys sapasyn baqylaý máselelerine de toqtaldy.
– Bıyl jańa Qurylys kodeksi kúshine endi. Kodeks ruqsat berý rásimderin tsıfrlandyrýdy, qurylysqa baqylaýdy kúsheıtýdi jáne tehnıkalyq tapsyrys berýshi ınstıtýtyn engizýdi kózdeıdi, – dedi spıker.
Onyń aıtýynsha, áleýmettik ınfraqurylym nysandaryn josparlaý kezinde óńirlik standarttar basshylyqqa alynady. Sonymen qatar jańa shaǵyn aýdandardyń ınjenerlik-kommýnıkatsııalyq ınfraqurylym nysandaryn jalpyulttyq ınfraqurylymdyq jobalar tizbesine engizý múmkindigi qarastyrylady.
– Qurylys sapasy men merzimderiniń saqtalýyn qamtamasyz etý úshin «E-Qurylys» aqparattyq júıesinde atqarýshylyq-tehnıkalyq qujattamany júrgizý arqyly jobalardyń iske asyrylýyna baqylaý kúsheıtildi, – dep túıindedi vıtse-mınıstr.
Aıta keteıik, Oljas Bektenov «Halyqtyq qurylys» baǵdarlamasynyń mańyzyn atap ótti.
