Qazaqstanda sırek kezdesetin janýarlar tizimine taǵy 11 túri engizilmek

ASTANA. KAZINFORM — Qazaqstandaǵy sırek kezdesetin janýarlar tiziminen 21 túri shyǵarylady. Bul týraly Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń otyrysynda QR Ekologııa jáne tabıǵı resýrstar vıtse-mınıstri Nurken Shárbıev málim etti.

- Respýblıka aýmaǵynda 835 omyrtqaly janýar túri mekendeıdi, onyń ishinde sútqorektiler – 178, qustar – 489, baýyrymen jorǵalaýshylar – 49, qosmekendiler – 12, balyqtar – 104. Qazaqstandaǵy sırek jáne joıylyp ketý qaýpi tóngen janýarlar tizimine 227 túri engizilgen, onyń ishinde 132 omyrtqaly jáne 96 omyrtqasyz janýar túri bar, - dedi N. Shárbıev.

Onyń aıtýynsha, joıylyp ketý qaýpi bar ańdardyń tizimin jańartý jumystary atqarylyp jatyr. Bul turǵyda qaýiptiń azaıýyna baılanysty omyrtqasyzdar sanatyndaǵy 21 túri tizimnen shyǵarylmaq. Sondaı-aq omyrtqasyzdardyń 6 (shaıannyń 3 túri men jándikterdiń 3 túri) túrin jáne omyrtqaly 5 (qustyń 2 túri men kesirtkeniń 2 túri jáne sútqorektiniń 1 túri) túrin tizimge qosý usynylyp otyr.

- Bul janýar túrlerin saqtaý mınıstrliktiń basym baǵyty sanalady. Elimizdiń bıoalýantúrliligin saqtaý maqsatynda júrgizilgen sharalardyń arqasynda toǵaı buǵysy, qulan, arqar, qaraquıryq sııaqty sırek kezdesetin túrlerdiń popýlıatsııasy artty, - dedi vıtse-mınıstr.

Budan buryn habarlanǵandaı, QR Parlamenti depýtattarynyń bastamashylyǵymen «Qazaqstan Respýblıkasynyń keıbir zańnamalyq aktilerine ańshylyq salasy jáne janýarlar dúnıesin saqtaý máseleleri boıynsha ózgerister men tolyqtyrýlar engizý týraly» zań jobasy Májiliske engizildi.