Qazaqstanda sırek kezdesetin aýrýǵa shaldyqqan balanyń emine 80 mln teńge bólinedi
Elimizde sırek kezdesetin dertke shaldyqqan bir balany emdeýge respýblıkalyq bıýdjetten jylyna 40-tan 80 mln teńgege deıin bólinedi. Bul týraly QR Densaýlyq saqtaý mınıstrliginiń medıtsınalyq kómekti uıymdastyrý departamentiniń áleýmettik mańyzy bar aýrýlar boıynsha kómek basqarmasynyń basshysy Gúlnar Maqsutova aıtty, dep habarlaıdy Kazinform.
Almaty qalasynda ótken «Orfandyq aýrýlar. Dıagnostıka men emdeýdiń ózekti máseleleri» atty respýblıkalyq ǵylymı-praktıkalyq konferentsııada Qazaqstannyń jetekshi mamandary orfandyq aýrýlardy dıagnostıkalaý jáne emdeý máselelerin talqylady.
«Elimizde atalǵan aýrýlardy emdeý kóp qarajatty qajet etedi. Memleket patsıentterdi TMKKK sheńberinde terapııamen qamtamasyz etý shyǵyndaryn ózine aldy. Mysaly, bir balany emdeýge respýblıkalyq bıýdjetten jylyna 40-tan 80 mln teńgege deıin bólinedi, sebebi bir ampýlanyń quny 300-den 600 myń teńgege deıin jetýi múmkin. Qazaqstan TMD elderiniń ishinde sırek kezdesetin aýrýlarmen aýyratyn naýqastardy emdeýdi memleket esebinen tolyq qarjylandyratyn memleketterdiń biri», - dedi Gúlnar Maqsutova.
Kardıologııa jáne ishki aýrýlar ǵylymı-zertteý ınstıtýtynyń Basqarma tóraǵasy Marat Pashımovtyń sózinshe, konferentsııanyń maqsaty – sırek kezdesetin aýrýlar týraly aqparat berilýin arttyrý jáne osyndaı aýrýlary bar naýqastar men olardyń otbasylaryna emdeý men medıtsınalyq kómekke qoljetimdilikti jaqsartý.
«2023 jyly 100-den astam patsıentke Fabrı aýrýy dıagnozy qoıyldy, olardyń 27-si terapııa qabyldaıdy. Óńirlik emdeý mekemelerimen FAT emdeý aıasynda orfandyq aýrýlary bar patsıentterge monıtorıng júrgiziledi, patsıentter dınamıkalyq tekserý úshin aýrýhanaǵa jatqyzylady. Jumys baǵdarlamasy ázirlendi», - dedi ol.
Іs-shara aıasynda aýtoımmýndy aýrýlardyń ımmýnologııalyq dıagnostıkasy boıynsha sheberlik saǵaty ótti.
