Qazaqstanda sırek kezdesetin ári joıylyp ketý qaýpi bar qustar mekendeıdi — Kazakh Tourism

ASTANA. KAZINFORM – Qazaqstannyń erekshe ekojúıesi tabıǵatty baqylaýǵa erekshe múmkindikter beredi. Bul týraly Ulybrıtanııanyń Qazaqstandaǵy elshisi Ketı Lıch «Kazakh Tourism» UK» AQ Basqarma tóraǵasy Qaırat Sádýaqasovtyń «Born Bold. Travel Boldcast» avtorlyq podkastynda baıandady.

Dıplomat ekotýrızmniń Qazaqstan úshin mańyzdylyǵyna erekshe toqtaldy. Ketı Lıchtiń aıtýynsha, bizdiń el — qustardy baqylaıtyn qaýymdastyq úshin basty baǵyttardyń biri.

— Aldymen Qazaqstan qustar turǵysynan Ortalyq Azııanyń kóshi-qon dálizinde ornalasqan jáne qustardyń mıgratsııasyna arnalǵan negizgi baǵyttardyń biri. Munda óte sırek kezdesetin jáne joıylyp ketý qaýpi bar qustar mekendeıdi. Mysaly, aqqutan, tarǵaq jáne dala qyrany. Joıylyp ketý aldynda turǵan sırek qustar Qazaqstan men Sibirde uıa salyp, odan keıin Qazaqstan arqyly Úndistanǵa, Taıaý Shyǵysqa nemese Afrıkaǵa qonys aýdarady. Qustardy baqylaý qaýymdastyǵy úshin bul óte mańyzdy. Ulybrıtanııadaǵy qustardy baqylaýmen aınalysatyn iri uıym «Koroldik qustardy qorǵaý qoǵamy» Qazaqstanda bıoalýantúrlilikti damytýǵa qoldaý kórsetip, 20 jyldan beri jumys istep keledi, — dep túsindirdi Ketı Lıch.

Elshi Qazaqstannyń kıik popýlıatsııasyn qalpyna keltirýdegi jetistikterine de toqtaldy. Osydan 15 jyl buryn bul erekshe janýarlardyń túri joıylý aldynda turdy. «Altyn dala» bastamasy aıasynda qazaqstandyq jáne sheteldik uıymdardyń birlesken kúsh-jigeriniń arqasynda kıik popýlıatsııasy qaıta qalpyna keldi.

— Olar birlesip, kıikti aman alyp qaldy. Onyń sany eksponentsıaldy túrde artyp keledi. Eki jyl buryn BUU bul jetistikti erekshe dep tanyp, bıoalýantúrlilikti saqtaýǵa baǵyttalǵan flagmandyq jobalardyń qataryna engizdi, — dedi dıplomat.

Eske sala keteıik, buǵan deıin Túrkistan oblysynda suńqar tektes qustardyń sany azaıyp ketkenin jazǵan edik.