Qazaqstanda sırek kezdesetin oraqtumsyq 2015 jyldyń qusy bolyp jarııalandy
ASTANA. QazAqparat - Qazaqstandyq bıoalýandyqty saqtaý qaýymdastyǵy (QBSQ) Qazaqstannyń qustardy qorǵaý odaǵymen birlese otyryp, jyl qusyn tańdady. 2015 jyly bul mártebege oraqtumsyq ıe boldy. Bul týraly atalǵan qaýymdastyqtyń baspasóz qyzmeti habarlady.
Oraqtumsyq Ortalyq Azııada ǵana tirshilik etedi. Onyń turqy qarǵanyń kólemindeı, oraq tárizdi uzyn ashyq qyzyl tusti tumsyǵymen erekshelenedi, keýdesinde qara jolaq bar. Oraqtumsyq shekteýli taraǵan qus túri retinde Qazaqstannyń Qyzyl kitabyna engizilgen. Bizdiń elimizde ol Soltústik jáne Ortalyq Tıan Shan men Jońǵar Alataýynyń bıik shyńdarynda tirshilik etedi.
Bul qus ádette teńiz deıńgeıinen 2000-3000 bıiktiktegi taý ózenderiniń ańǵaryna, ózen qoltyqtary men araldarǵa uıa salady. Mundaı aýmaqtar Qazaqstanda kóp emes, sondyqtan da oraqtumsyq sırek kezdesetin qustardyń biri - bizde qustyń nebári birneshe ondaǵan juby uıa salady. Qus óziniń uıasynyń mańynda qystap shyǵaday, kúshti aıazdarda ózenniń tómengi aǵysymen taý etegine deıin tómen túsedi.
Oraqtumsyq beınesi 2015 jyly tamyz aıynda Almatyda ótetin XIV Halyqaralyq Soltústik Eýrazııa ornıtologııalyq konferentsııasynyń emblemasy bolady. Sharany birqatar qazaqstandyq jáne reseılik uıymdar uıymdastyrǵaly otyr.
