Qazaqstanda sırek kezdesetin árbir janýardy saqtaýdyń arnaıy baǵdarlamasy bolýy qajet - BUU DB

ASTANA. QazAqparat - BUU Damý baǵdarlamasynyń sarapshylary sırek kezdesetin janýarlardyń árbir túri boıynsha arnaıy baǵdarlamany qabyldaý qajet dep sanaıdy. Osy oraıda olar Reseı Federatsııasynyń tájirıbesin qolǵa alýdy usynyp otyr, dep xabarlaıdy QazAqparat tilshisi.

«Qazirgi kezde Qazaqstanda janýarlar men ósimdikterdiń túrlerine qaraı jeke-jeke saqtaý baǵdarlamalary joq. Bul - úlken kemshilik. Máselen, Eýropa elderi bylaı tursyn, kórshi otyrǵan Reseıdiń ózi jabaıy ógiz, ıaǵnı zýbrdyń sanyn kóbeıtýdiń arnaıy baǵdarlamasyn qabyldady. Sonyń arqasynda jabaıy ógizderdiń sany ósip keledi. Reseı prezıdenti jeke ózi osy máseleni baqylap keledi», - deıdi BUU DB bıoalýandylyqty saqtaý jobalarynyń menedjeri Talǵat Kerteshev.

Onyń aıtýynsha, qazirgi kezde BUU DB aýyl sharýashylyǵy úshin qoqıqaz, qulan, Prjevalskıı jylqysy jáne taǵy basqa janýarlar boıynsha arnaıy baǵdarlamalardy daıarlap jatyr. «Bizde bıoalýandylyqty saqtaýdyń 2030 jylǵa deıingi arnaıy strategııasy bar. Qyzyl kitapqa engizilgen janýarlardyń árbir túri boıynsha jeke-jeke jumys jasaý qajet dep sanaımyz. Sonda ǵana keler urpaqqa sırek kezdesetin janýarlardy qaz-qalpynda tapsyra alamyz», - dep atap kórsetti uıym múshesi.