Qazaqstanda syrany tańbalaý júıesi qalaı iske asady
ASTANA. KAZINFORM — Qazaqstanda syra ónimderin tańbalaý kezeń-kezeńimen engizilip jatyr. Bul týraly Memlekettik kirister komıtetiniń aktsızderdi ákimshilendirý basqarmasynyń basshysy Ablaı Mekebaev málim etti.
Onyń aıtýynsha, tańbalaý júıesi birneshe kezeńge bólingen. Alǵashqy kezeńde kegtegi jáne shyny bótelkedegi syra tańbalanady, al 2027 jyldan bastap temir bankidegi ónimge de engiziledi.
— Qazirgi ýaqytta agregatsııa men ónimdi aınalymnan shyǵarý protsesteri josparlanǵan. Al orta tsıklde júzege asatyn agregatsııa kezeńi bir jylǵa, kelesi jylǵa shegerilgen. Bul úshin kásipkerler arnaıy servıste tirkelip, baqylaý-kassa mashınalary arqyly satý kezinde kodtardy skanerleıdi. Skanerleý barysynda taýar avtomatty túrde aınalymnan shyǵarylady, — dedi spıker.
Sonymen qatar syrany esepke alý vırtýaldy qoıma júıesi arqyly da júrgizile beredi. Qoldanystaǵy talaptarǵa sáıkes, taýarlarǵa ilespe júkqujat (TІJ) rásimdeý mindeti saqtalady jáne syrany qosa alǵanda, jekelegen taýar toptaryna qatysty erekshelik qarastyrylmaǵan.
Efır barysynda spıker ónimdi esepten shyǵarý da skanerleý tásilimen júzege asyrylady. Bul tájirıbe buǵan deıin tańbalanǵan temeki ónimderine qoldanylǵan. Kassada kod skanerlengen kezde ol júıede avtomatty túrde aınalymnan shyǵarylǵan retinde tirkeledi dep atap ótti.
Buǵan deıin 2026 jylǵy 1 aqpannan bastap Qazaqstanda Saýda jáne ıntegratsııa mınıstrliginiń buıryǵyna sáıkes syra qaınatý ónimderin tsıfrlyq tańbalaý kezeń-kezeńimen engizý bastalatynyn jazǵanbyz.