Qazaqstanda sıntetıkalyq esirtki saýdasy beleń alýda

NUR-SULTAN. QazAqparat - Jyl basynan beri Qazaqstanda sıntetıkalyq esirtki jasaýmen aınalysqan 3 zerthana anyqtaldy. Bul týraly búgin QR Іshki ister mınıstri Erlan Turǵymbaev esep berý kezdesýi barysynda aıtty, dep habarlaıdy QazAqparat tilshisi.

«Esirtki qylmysyna qarsy kúres boıynsha naqty jumystar júrgizilip jatyr. Jyl basynan beri 1 myńnan astam esirtki qylmysy, onyń ishinde 748 satý jáne 49 kontrabanda faktisi anyqtaldy. Esirtki bıznesi salasynda 3 uıymdasqan qylmystyq toptyń áreketi tyıyldy. Zańsyz aınalymnan 1,5 tonna esirtki alyndy», - dedi mınıstr.

Onyń aıtýynsha, elimizge keletin geroın kóleminiń qysqarýyna baılanysty sıntetıkalyq esirtki keńinen tarala bastady. Osy jyldyń ózinde sıntetıkalyq esirtki aınalymyna qatysty 261 fakti anyqtalyp otyr.

«Mundaı 26 keliden astam esirtki tárkilendi. Bul ótken jyldyń dál osyndaı kezeńimen salystyrǵanda 5,5 ese kóp. Sıntetıkalyq esirtki daıyndalý jáne satý turǵysynan arzandyǵymen erekshelenedi. Jyldyń basynan beri jasyryn 3 esirtki zerthanasy anyqtalyp, jabyldy»,- dedi ol.

Mınıstrdiń aıtýynsha, esirtki satýshylar ınternet-resýrstar men elektrondy tólem júıesiniń múmkinshilikterin belsendi paıdalanady. Osyǵan baılanysty atalǵan tehnologııalardy qoldaný arqyly esirtki qylmysyn jasaǵandarǵa jaýapkershilik qatańdatylǵan.

«Qabyldanǵan sharalardyń arqasynda mundaı 500 elektrondy resýrs anyqtalyp, 234 esirtki saıttarynyń elektrondy meken jaıy kórsetilgen graffıtı-jazba óshirildi», - dedi Erlan Turǵymbaev.