Qazaqstanda sıntetıkalyq esirtki aınalymy báseńdedi

ASTANA. KAZINFORM — Qazirgi ýaqytta sıntetıkalyq esirtkilerdiń qymbattaýy men tapshylyǵy baıqalady. Bul týraly QR ІІM Esirtki qylmysyna qarsy is-qımyl komıtetiniń tóraǵasy Danııar Meırhan Ortalyq kommýnıkatsııalar qyzmetiniń baspasóz alańynda málimdedi.

— Atap aıtqanda, olardyń baǵasy 25 myń teńgeden 35 myń teńgege deıin ósken. Sondaı-aq tasymaldaý barysynda turaqty kedergiler bar, — dedi ol. 

Onyń aıtýynsha, bul jaǵdaı esirtki óndirisine, logıstıkasyna jáne ótkizý arnalaryna baǵyttalǵan júıeli jumystardyń tikeleı nátıjesi.

— 2025 jylǵy naýryz aıynan bastap esirtki zattaryn medıtsınalyq maqsattan tys tutynǵany úshin ákimshilik jaýapkershilik engizildi. Osy ýaqyt aralyǵynda 6 myńnan astam quqyq buzýshy jaýapqa tartyldy. Bul sharalar profılaktıkalyq tıimdilik berip otyr, — dedi Danııar Meırhan.

Sondaı-aq ol brıfıng barysynda byltyrǵy qyrkúıek aıynan bastap dropperlik úshin qylmystyq jaýapkershilik kózdelgenin eske saldy.

— Qazirgi tańda úshinshi tulǵalardyń tólem kartalaryn paıdalaný boıynsha 49 derek anyqtalǵan. Onyń 35-i esirtki zattarynyń zańsyz aınalymymen baılanysty. Sonymen qatar qadaǵalaýdaǵy zattar tizbesi 47 ataýǵa keńeıtiledi, — dep tolyqtyrdy ІІM ókili.

Buǵan deıin byltyr elimizde qansha esirtki qylmysynyń joly kesilgenin jazǵanbyz.