Qazaqstanda Sinotruk-pen birlesken kásiporyn quryldy
ASTANA. KAZINFORM — Premer-mınıstrdiń birinshi orynbasary Roman Sklıardyń qatysýymen Sinotruk kompanııasynyń Qazaqstandaǵy Saran Machinery kompanııasyna qosylýy týraly kelisimge qol qoıyldy. Bul týraly Úkimettiń baspasóz qyzmeti habarlady.
Osylaısha kommertsııalyq jáne arnaıy tehnıka óndiretin birlesken kásiporyn quryldy.
Joba Úkimet pen Qaraǵandy oblysy ákimdiginiń qoldaýymen ónerkásiptik yntymaqtastyqty damytý aıasynda júzege asyryldy. Jańa zaýyt elimizdegi kommertsııalyq tehnıka óndirisin damytýdyń mańyzdy ortalyǵy bolady.
Birlesken kásiporyn Saran qalasyndaǵy «Saran Machinery» JShS bazasynda ornalasqan. Óndiristiń jyldyq qýaty 10 000 dana tehnıkany, onyń ishinde HOWO markaly júk kólikterin shyǵarýdy qamtıdy.
Jańa zaýyt zamanaýı tehnologııalyq keshenmen jabdyqtalady, onyń ishinde Qazaqstandaǵy metalldy kataforezdik óńdeýdiń alǵashqy jelisi bar. Bul qondyrǵy kýzovtardy korrozııadan joǵary deńgeıde qorǵaıdy jáne tehnıkanyń paıdalaný merzimin edáýir uzartady.
— Lokalızatsııany damytýǵa basa nazar aýdarylyp otyr. Kásiporyn Qarmet metallýrgııalyq zaýytynda óndirilgen myryshtalǵan bolattan jasalǵan kýzov bólshekterin paıdalanýdy josparlap otyr. Bul qazaqstandyq shıkizatty tolyqtaı paıdalanýǵa jáne óndiris tsıklyn el ishinde uıymdastyrýǵa múmkindik beredi, — dedi Roman Sklıar.
Sinotruk buǵan deıin Qazaqstandaǵy jergilikti seriktestermen birge birlesken óndiris júrgizip, yntymaqtastyqtyń negizin qalaǵan bolatyn.
Jańa kásiporyn óndiris qýatyn arttyryp, jumys oryndaryn kóbeıtip, lokalızatsııany joǵarylatýdy kózdeıdi. Joba tolyq qýatqa shyqqan soń 1 000 adamǵa deıin jumys ornyn qurýy josparlanǵan.
2025–2026 jyldary Ónerkásipti damytý qorynyń qoldaýymen tehnologııalyq jabdyqtar kezeń-kezeńimen jetkiziledi. 2025 jylǵy qazanda shassı men kabınalardy jınaýǵa arnalǵan jabdyqtar, al 2026 jyldyń ekinshi toqsanynda boıaý jáne dánekerleý jabdyqtary keledi.
Aıta ketelik Premer-mınıstr Oljas Bektenov Memleket basshysynyń jasandy ıntellektini damytý jónindegi tapsyrmalaryn júzege asyrý máseleleri boıynsha jıyn ótkizgen edi.