Qazaqstanda sım-bokstardy tirkeý jáne paıdalaný tártibi bekitildi
ASTANA. KAZINFORM — Budan bylaı Qazaqstan aýmaǵynda óndirilgen jáne elge ákelingen barlyq sım bokstardy mindetti túrde tirkeý qajet. Al olardy tirkeý tegin júzege asyrylady, dep habarlaıdy Kazinform tilshisi.
Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev qol qoıǵan buıryqqa sáıkes, sım-boks ıeleri qurylǵyny qoldaný úshin avtomattandyrylǵan qyzmet kórsetý júıesi arqyly nemese www.rfs.gov.kz (https://www.rfs.gov.kz) saıtynda kórsetilgen derekqor operatorynyń keńsesine júginýi kerek. Sondaı-aq jeke sáıkestendirý nómiri (JSN) nemese bıznes sáıkestendirý nómirin (BSN), oǵan qosa qurylǵynyń sáıkestendirý kodyn usynýy tıis.
Derekterdiń durystyǵyna qurylǵy ıesi jaýap beredi.
Derekqor operatory aqparatty alǵannan keıin jeke tulǵalar úshin jumys kúnderi 3 saǵatta, al zańdy tulǵalar úshin 6 saǵatta qurylǵyny tekserýden ótkizedi.
Bul tekserý qurylǵynyń basqa tulǵa atyna tirkelmeýin jáne Qazaqstannyń uıaly baılanys jelilerinde zańdy paıdalanylýyn anyqtaýǵa baǵyttalǵan.
Málimetke saı, tekserý barysynda qurylǵylardyń statýsy aq, sur jáne qara tizimdegi bolyp bólinedi.
— Sur tizim — zańdy paıdalanýyna qatysty málimetter rastalmaı qalǵan jaǵdaıda 30 kún merzimge ǵana qoldanýǵa berilgen qurylǵylar;
— Qara tizim — 30 kún merzim aıaqtalǵannan keıin qaıta tekserý júrgizilip, áli de rastalmaǵan qurylǵylar;
— Aq tizim — zańdy túrde paıdalanýǵa ruqsat etilgen qurylǵylar.
Tirkeý rásimi jeke tulǵalar úshin 4 saǵatta, zańdy tulǵalar úshin 8 saǵatta aıaqtalady.
Sım-boks ıeleri óz qurylǵylaryn tirkeýden shyǵarý úshin de avtomattandyrylǵan júıe nemese derekqor operatorynyń keńsesine júginý arqyly ótinish bere alady. Bul jaǵdaıda da jeke tulǵalardyń ótinishi 4 saǵat, zańdy tulǵalardyń ótinishi 8 saǵat ishinde qaralady.
Atalǵan buıryq resmı jarııalanǵan kúnnen keıin on kúntizbelik kún ótken soń, ıaǵnı qarashanyń 10-y kúni kúshine enedi.
Aıta ketelik uıaly baılanys júıesin aınalyp ótetin zańsyz sım-boks qurylǵysy anyqtaldy.
Kamıla Múlik