Qazaqstanda sıyr tuqymyn embrıon deńgeıinde asyldandyratyn zerthana ashylýy múmkin
ASTANA. KAZINFORM — Bul týraly Aýyl sharýashylyǵy mınıstriniń orynbasary Amanǵalı Berdalın ortalyq kommýnıkatsııalar qyzmetinde ótken baspasóz máslıhatynda málim etti.
— Mal basy men sapasyn arttyrý úshin jasandy uryqtandyrýdyń zamanaýı tehnologııalary engiziledi, — dedi Amanǵalı Berdalın.
Mınıstrliktiń málimetine súıensek, osy maqsat aıasynda sıyrdy embrıon deńgeıinde uryqtandyrýdyń zerthanasyn qurý máselesi pysyqtalyp jatyr. Bul tásilde analyq bastyń da, buqanyń da genetıkalyq qasıetteri suryptalady. Osynyń arqasynda jańa mal násili tez qalyptasyp, mal basy men sapasy jyldam artady.
— Bul tehnologııa joǵary ónimdi mal basyn alý protsesin edáýir jedeldetýge jáne otandyq maldyń genetıkalyq áleýetin arttyrýǵa múmkindik beredi, — dedi vıtse-mınıstr.
Buǵan deıin Qazaqstan eksporttaı alatyn sıyr etiniń lımıti bekitilgenin jazǵan edik.
Sonymen qatar Torǵaı óńirinde jaılaýdaǵy mal sharýashylyǵyn damytýǵa 6 paıyzdyq nesıe bólinetini belgili boldy.