Qazaqstanda sıyr etin eksporttaý talaptary jeńildeıdi
ASTANA. KAZINFORM — Qazaqstannyń Aýyl sharýashylyǵy mınıstrligi elimizden iri qara mal etin eksporttaý erejelerine ózgerister engizýdi josparlap otyr. Bul týraly «Ashyq NQA» portalynda jarııalandy.
Vedomstvo usynǵan jańa ózgerister bordaqylaý isimen aınalysatyn sharýalardyń jumysyn jeńildetpek. Atap aıtqanda, buǵan deıin tek iri kásiporyndarǵa tıesili bolǵan kvotalar endi orta deńgeıdegi sharýashylyqtarǵa da qoljetimdi bolady.
— Bul joba otandyq taýar óndirýshilerdi yntalandyrý úshin ázirlendi. Biz naryqqa jańa oıynshylardyń shyǵýyna jol ashyp, eksporttyq kedergilerdi alyp tastaýdy kózdep otyrmyz, — delingen qujatta.
Osy oraıda, eksportqa shyǵarylatyn et kólemi bordaqylaý alańynyń qýattylyǵyna, ıaǵnı ondaǵy mal basynyń sanyna tikeleı baılanysty bolyp qala beredi. Qujatqa sáıkes, kvota mólsheri kelesideı tártippen bólinedi:
- 5 000 basqa deıingi qýattylyǵy bar alańdar úshin — 1 000 tonna;
- 10 000 basqa deıingi qýattylyǵy bar alańdar úshin — 2 000 tonna;
- 15 000 basqa deıingi qýattylyǵy bar alańdar úshin — 3 000 tonna;
- 20 000 basqa deıingi qýattylyǵy bar alańdar úshin — 4 000 tonna;
- 50 000 basqa deıingi qýattylyǵy bar alańdar úshin — 10 000 tonna.
Aıta keteıik, buryn tek óz et kombınaty barlarǵa ǵana basymdyq berilse, endi 5 000-nan astam maly bar bordaqylaý alańdary jeke mal soıatyn tsehy bolmasa da, ózge kásiporyndar arqyly óz ónimin shetelge saýdalaı alady. Sondaı-aq, óz et kombınaty bar sharýashylyqtar úshin mal basynyń shekti sany 500-ge deıin tómendetilgen.
Jalpy kvota kólemi 20 myń tonna deńgeıinde saqtalyp, ol 6 aı merzimge jaramdy bolady.
Buǵan deıin, Kazinform agenttiginiń tilshisi qalalardaǵy et baǵasyn salystyrǵan edi.